डिग्री क्याम्पसको माइक्रोस्कोप चोरी गर्ने तीन युवक पक्राउ

विराटनगर : विराटनगर महानगरपालिका–१४ स्थित डिग्री क्याम्पसको प्रयोगशालाबाट माइक्रोस्कोप लगायतका उपकरणहरु चोरी गर्ने तीनजनाको समुहलाई प्रहरीले पक्राउ गरेको छ ।

पक्राउ पर्नेमा सोही ठाउँका २२ वर्षीय प्रमोद मण्डल, १८ वर्षीय दिपक पासवान र विराटनगर–१८ बस्ने १८ वर्षीय कुमार राउत रहेका छन् । 

उनीहरुले गत बुधबार विहान करीव ७ः४५ बजेको समयमा डिग्री क्याम्पसको प्रयोगशालाभित्र रहेको माईक्रोस्कोप चार थान र पिएच मिटर एक थान चोरी गरेको जिल्ला प्रहरी कार्यालय मोरङका प्रवक्ता प्रहरी नायव उपरीक्षक रञ्जनकुमार दाहालले जानकारी दिए ।

चोरीका क्रममा उनीहरुले प्रयोगशालाभित्र रहेको दराज तोडफोड समेत गरेको जनाइएको छ । तिनैजनालाई चोरीका सामानसहित नियन्त्रणमा लिइएको र मोरङ जिल्ला अदालतबाट चोरी कसूरमा पाँच दिनको म्याद थप गरी अनुसन्धान अघि बढाइएको प्रहरीले जनाएको छ ।