हिक्मत कार्की मुख्यमन्त्री दाबी गर्न प्रदेश प्रमुखकहाँ जाने, केदार कार्की आफ्नो वैधानिकता दाबी गर्न सर्वोच्च जाने

विराटनगर । कोशी प्रदेशका प्रदेश प्रमुख परशुराम खापुङ्गले शुक्रबार अपरान्ह ५ बजेसम्म संविधानको धारा १६८ को उपधारा (५) बमोजिमको सरकारको दाबी पेश गर्न आह्वान गरेसँगै कोशी प्रदेशमा छैटौँ सरकार बनाउने गृहकार्य सुरु भएको छ ।

प्रदेश प्रमुखले सरकार गठनका लागि दाबी पेश गर्न आह्वान गरेसँगै नेकपा एमाले संसदीय दलका नेता हिक्मत कुमार कार्कीले आज साढे १० बजे एमालेका ३९ र माओवादी केन्द्रका १३ सहित ५२ जना प्रदेश सभा सदस्यको हस्ताक्षरसहित दाबी पेश गर्दैछन् । 

दाबी पेश गरेपछि प्रदेश प्रमुख खापुङ्गले बहुमत प्रमाणित गर्न मुख्यमन्त्रीका दाबीकर्ता कार्कीसहितलाई सशरीर सनाखतका लागि उपस्थित गराउने छन् । सनाखत लगत्तै उनले उपधारा (५) बमोजिम प्रदेश सभाको सदस्यको हैसियतमा हिक्मतकुमार कार्कीलाई मुख्यमन्त्री नियुक्त गर्ने जनाइएको छ ।

अर्कोतिर पदमुक्त हुन लागेका वर्तमान मुख्यमन्त्री केदार कार्की भने आफू नेतृत्वको सरकारको बैद्यता दाबी गर्दै आजै अदालत खुल्ने बितिक्कै सर्वोच्च अदालतमा रिट निवेदन लिएर पुग्दैछन् । उनले आफू  संविधान अनुसार पदमुक्त नभई अर्को व्यक्तिलाई मुख्यमन्त्री नियुक्त गरिएको भन्दै सर्वोच्च पुग्ने योजना बनाएका हुन् ।

मुख्यमन्त्री कार्की निकट स्रोतका अनुसार रिट निवेदन तयार भइसकेको र सर्वोच्च अदालत खुल्ने बितिक्कै रिट दर्ता गर्ने जनाइएको छ ।