भँडारे खोलाले सडक बगाउँदा सिद्धिचरण राजमार्गमा यात्रुलाई सास्ती (फोटो)

विराटनगर । अविरल बर्षाका कारण सिद्धिचरण राजमार्ग अन्तरगत ओखलढुंगाको भँडारे खोलामा आएको बाढीले यातायात अवरुद्ध भएको छ । 

ओखलढुंगाको मानेभञ्ज्याङ गाउँपालिका–६ र ७ को सिमानास्थित भँडारे खोलाले लेदो र ढुंगासहितको बाढी आएर सडकको १० मिटर क्षति पुर्‍याएको हो ।

सडकमा क्षति पुगेपछि यातायात अवरुद्ध भएको जिल्ला प्रहरी कार्यालय ओखलढुंगाले जनाएको छ ।

यातायात अवरुद्ध हुँदा सडकको दुवैतिर सवारी साधनको लाम लागेको थियो । 

प्रहरी चौकी हर्कपुरबाट खटिएको प्रहरीको सहयोगमा खोलाले बगाएको सडक खण्डमा ढुंगा माटो लगाएर पुनः सुचारु गरिएको जनाइएको छ ।