साढे तीन करोडको लागतमा बन्ने भवन शिलान्यास गर्दै उद्योग बाणिज्य महासंघ कोशी

विराटनगर । नेपाल उद्योग बाणिज्य महासंघ कोशी प्रदेश समितिले आगामी माघ २१ गते कार्यालय भवनको शिलान्यास गर्ने भएको छ । 

अध्यक्ष राजेन्द्र राउतको अध्यक्षतामा बिहीबार बसेको प्रदेश समितिको सातौं बैठकले सोही दिन सातौं प्रदेश सभा (साधारण सभा) समेत गर्ने निर्णय गरेको जनाइएको छ ।

प्रदेश सभाको अवसर पारेर ३ करोड २९ लाख रुपैयाँ लागत अनुमान गरिएको सुविधा सम्पन्न कार्यालय भवनको शिलान्यास गरिने अध्यक्ष राउतले बताए । महासंघले मोरङको बुढिगंगा गाउँपालिका–२ सक्मामा जग्गा खरिद गरिसकेको छ । 

उक्त जग्गामा दुईसय मानिस अट्ने सभा हल, अतिथिगृह र सुविधा सम्पन्न अढाइतले सचिवालय भवन निर्माण हुने अध्यक्ष राउतले जानकारी दिए ।

महासंघको भवन निर्माण गर्न विराटनगर–४ का लक्ष्मण बस्नेतले एक कठ्ठा जग्गा महासंघलाई बिक्री गर्दा थप एक कठ्ठा जग्गा निशुल्क उपलब्ध गराएका थिए । 

महासंघको भवन निर्माण गर्न तत्कालिन कार्यसमितिको उपाध्यक्ष रहेका राउतको संयोजकत्वमा निर्माण समिति नै बनाइएको थियो । 

अहिले महासंघ कोशी प्रदेश समितिको अध्यक्ष रहेका राउतले आफ्नो कार्यकालमै सुविधा सम्पन्न कार्यालय भवन बनाउने गरी अघि बढेका हुन् । 

महासंघका केन्द्रीय अध्यक्ष चन्द्रप्रसाद ढकालसहितको उपस्थितिमा भवन निर्माणको भव्य शिलान्यास गरिने जनाइएको छ ।