अधिवेशन स्थलमै पुगेर मुख्यमन्त्री कार्कीले गरे एकान्त गफ

विराटनगर । विराटनगरको होटल मनास्लु इनमा नेकपा एमाले मोरङको १० औं अधिवेशन चलिरहेको छ । आज मंगलबार मतदान गर्ने तयारी भइरहेको बेला कोशीका मुख्यमन्त्री हिक्मतकुमार कार्की अधिवेशनस्थल पुगेर कार्यकर्तासँग भेटघाट गरेका छन् । 

केहीबेर अघि अधिवेशनस्थल पुगेका मुख्यमन्त्री कार्कीले केही कार्यकर्ताहरूलाई एकान्तमा बोलाउँदै गफ गर्दै गरेका थिए ।

जिल्ला अधिवेशनमा राजकुमार ओझालाई जिताउने अभियानमा रहेका मुख्यमन्त्री कार्कीले मुख्यमन्त्री कार्यालयबाटै ओझाका पक्षमा मत मागिरहेका थिए । मंगलबार भने उनी अधिवेशनस्थलमै पुगेर केहीबेर कार्यकर्ता भेटेका थिए । 

२०८० को असोजमा विराटनगरमै भएको एमालेको प्रदेश अधिवेशनमा कार्कीलाई राज्यसत्ताको दुरुपयोग गरेको आरोप लागेको थियो ।

विनोद ढकालको विपक्षमा उभिने जो कोहीलाई साथ दिने बताउने मुख्यमन्त्री कार्कीले यसपटक जिल्ला अधिवेशनमा पनि ढकाल समूहलाई हराउन भन्दै दौडधुप जारी राखेका हुन् ।

चुनावको मुखैमा अधिवेशनस्थलमा आएर मुख्यमन्त्रीले कार्यकर्ताहरुसँथ कानेखुसी गर्दै छलफल गरेको देख्नेहरुले असन्तोष प्रकट गरेका छन् ।

‘उनी पार्टीका नेता मात्रै होइनन्, प्रदेशका मुख्यमन्त्री पनि हुन्’, एक कार्यकर्ताले भने ‘चुनाव प्रभावित पार्ने ध्येयले उनले आएर गतिविधि गर्नु आपत्तिजनक छ ।’

जारी जिल्ला अधिवेशनमा संस्थापन र इतर समूह गरी दुई समूहले प्यानलै बनाई उम्मेदवारी दिएका छन् । प्यानल बनाई उम्मेदवारी दिन नपाइने पार्टीको केन्द्रको नीति विपरीत दुवै समूहले उम्मेदवारी दिएका हुन् ।

दुवै समूहले आ–आफ्नो प्यानलको उम्मेदवारको फोटो राखी सामाजिक सञ्जालमा मत माग्न सुरु गरिसकेका छन् । संस्थापन पक्ष राजकुमार ओझा नेतृत्वमा चुनावी मैदानमा होमिँदा इतर पक्ष अजम्बर राईको अगुवाईमा प्रतिष्पर्धामा ओर्लिएका छन् ।

अध्यक्षका दुई उम्मेदवारमध्ये प्रदेशका  पूर्वसांसद ओझालाई  कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ ।

अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ ।

ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन् । कार्की विराटनगरकी उपमेयर हुन् । 

त्यस्तै, ढकाल समूहबाट अध्यक्ष अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा  सन्तोष वान्तवा र उषा झाले उम्मेदवारी दिएका छन् । उषा झा जिसस मोरङकी उपप्रमुख हुन् ।

एमाले मोरङ जिल्ला कमिटी पदाधिकारीसहित  १६५ सदस्यीय हुनेछ । निर्वाचन कमिटीले उम्मेदवारको अन्तिम नामवली हालसम्म प्रकाशन नगरेकाले मतदान कहिले हुने भन्ने अहिलेसम्म अन्योल छ ।