कटहरीका ५१ जनालाई ब्ल्याङ्केट

विराटनगर । तिब्र जाडो बढेका बेला रात काट्न कठिन भएका मोरङ कटहरी २ का ५१ जना गरिव परिवारलाई स्थानीय एक दाताले न्यानो कपडा उपलब्ध गराएका छन् ।

नेपाली कांग्रेस कटहरी २ ले सोमबार एक कार्यक्रमको आयोजना गरेर बिपन्न परिवारका सदस्यलाई बाक्लो ब्ल्याङ्केट उपलब्ध गराएको हो । 

स्थानीय समाजसेवी विनोदकुमार गुप्ताले प्रदान गरेको न्यानो कपडा र उनीहरुलाई मिठो मिठाई दिइएको कांग्रेस वार्ड सभापति संजय मण्डलले बताए ।

उनका अनुसार, केही दिनदेखि घामपनि नलागेको र अति बिपन्न परिवारका सदस्यलाई जाडो काट्न समस्या भएको जानकारी गराएपछि गुप्ताले सो सहयोग गरेका हुन् । 

कपडा खरिद गर्न नसक्ने अति गरिव परिवारलाई आवश्यक्ता अनुसार सहयोग गर्दै जाने गुप्ताको भनाई छ ।

सिंघिया खोला किनारमा बसेका सुकुम्बासी परिवारलाई खोलाको चिसो हावाले यो बेला सताउने गरेको छ । 

कांगेस नेता तथा कटहरी गाउँपालिकाका पूर्व अध्यक्ष रामकुमार कामतले न्यानो कपडा बितरण गर्दै बिभिन्न खाले बिपदमा स्थानीय सरकार, समाजका दाता र संघ संस्था अग्रसर हुनु पर्ने बताए ।