पौडीमा एभरेष्ट स्कुललाई १७ स्वर्ण

विराटनगर । विराट स्वीमिङ ट्रेनिङ सेन्टरको आयोजनामा सम्पन्न विराटनगर अन्तर विद्यालय पौडी प्रतियोगितामा विराटनगर– ५ स्थित एभरेष्ट स्कुलले १७ स्वर्ण जितेको छ ।

एभरेष्टले प्रतियोगितामा खेलाइएका ३३ इभेन्टमध्ये १७ वटामा स्वर्ण पदक जितेको हो । विराटनगरकै लिलिपुट र श्रीश्री रबिशंकर स्कुलले चार/तार स्वर्ण पदक जित्दा बीकेभीएम र दिल्ली पब्लिक स्कुल (डीपीएस) स्कुलले दुई/दुई वटा स्वर्ण जितेका छन् ।

यस्तै सेन्ट म्यारी, सेन्ट जोसेफ, ह्याप्पी किड्स र सिद्धार्थ स्कुलले एक–एक स्वर्ण जितेको ट्रेनिङ सेन्टरका सचिव सागर भट्टराईले जानकारी दिए ।

उनका अनुसार २५,५०,१००,२००,४०० र १५०० मिटरका विभिन्न स्पर्धाहरु भएका थिए । एभरेष्ट स्कुलको स्वीमिङ पुलमा भएको प्रतियोगितामा विराटनगरका १० विद्यालयले सहभागिता जनाएका थिए । विजेता खेलाडीहरूलाई मेडल र प्रमाणपत्र वितरण गरिएको थियो । प्रतियोगिता शुक्रबार र शनिबार दुई दिन सञ्चालन भएको थियो ।