कारवाहीको प्रक्रियामा पुग्दैन सुन चोरीका घटना

मोरङ । चोरीको सुन किनबेच हुने गरे पनि दुई पक्षबीच मेलमिलाप हुने भएकाले चोरीमा संलग्न व्यक्ति जोगिने गरेका छन् । पीडितले क्षतिपूर्ति पाउने भएकाले चोरले उन्मुक्ति पाउने गरेका छन् ।

मोरङ रंगेलीका श्याम अग्रवालको घरबाट उनकै कामदार सचिन जानकरले ७५ ग्राम सुन चोरी गरेर धनपालथान–४ कर्सियामा बस्ने राजु बंगालीलाई बिक्री गरेका थिए ।

चोरी गर्ने र खरिद गर्ने दुबै भारतीय भएकाले मध्यस्थकर्ताले गएको शुक्रबार इलाका प्रहरी कार्यालय रंगेलीमै सो घटनामा मिलापत्र गराए ।

चोरीमा संलग्न जानकर खुलेआम हिँडेका छन् भने खरिद गर्ने लुकेर बस्न बाध्य भएका छन् । प्रहरी कार्यालयमा भएको मेलमिलापमा चोरीको विषय उल्लेख नगरी झगडामा मिलापत्र गरिएको थियो ।

बंगालीले अग्रवाललाई दुई लाख रुपैयाँ बुझाएर सहमति गरेका थिए । चोरीको सुन बिक्री गर्न रंगेलीकै सुनचाँदी व्यवसायी दिपेन सोनारले सहयोग गरेका थिए ।

स्रोतका अनुसार काँचो चाँदी लिएर भारततर्फ गएका सोनार त्यहीँ पक्राउ परेर कारवाही भोगिसकेका व्यक्ति हुन् ।

नेपालतर्फ पनि चाँदीका गहनासहित उनी पक्राउ परेका थिए । दुबैतर्फ उनको मोटरसाइकल जफत भएको थियो ।

त्यसअघि विराटनगर–९ ठाकुरबाडी (रामजानकी) रोडमा रहेको बाबा ज्वेलरीले सुनधनी कटहरीका एक व्यक्तिलाई क्षतिपूर्ति दिएपछि चोरसँग मिलापत्र भएको थियो ।

मिलापत्रमा चोरीमा संलग्न ललिता शर्मासँग खरिदकर्ता तथा बाबा ज्वेलरीका सञ्चालक सुबोध साहले हस्ताक्षर गरेर चोर्ने र चोरीको वस्तु खरिद गर्ने दुबैले अपराध लुकाए । साहले चोरीको सुन खरिद गरेको एक लाख ५० हजार रुपैयाँ पीडितलाई बुझाएका थिए ।

यस्तै गत असारमा रामजानकी रोडकै ओम शान्ति ज्वेलर्सले चोरलाई जोगाएको थियो । ज्वेलर्सका सञ्चालक महेश साहले चोरीको सुन धितो राखेका थिए ।

धितो राख्ने ललिता शर्मँसँग रकम फिर्ता लिने गरी कागज गरेर सुनधनीलाई साहले ५ लाख ५० हजार रुपैयाँ क्षतिपूर्ति दिएका थिए ।

चोरीको सुन खरिद र धितो बारे प्रहरीमा उजुरी नदिन क्षतिपूर्ति दिएर भए पनि मिलापत्र गरिने गरिन्छ ।

चोरीको सुन खरिद गर्ने पनि चोर सरह कानुनी कारवाहीमा पर्ने भएकाले गोप्य मिलापत्र हुन्छ । जसका कारण चोर कारवाहीको दायरामा आउँदैनन् ।

चोरीको सुन खरिद गर्ने वा धितोमा राखेर मिटर ब्याजमा लगानी गर्ने गरिन्छ । सुनचाँदी ब्यवसायी संघ मोरङका अध्यक्ष शशी साहले बिल बिनाका धातु खरिद र धितो नराख्न आफ्ना सदस्यहरूलाई सचेत गराउँदै आएको बताउँछन् ।

राजश्व तिर्ने र स्थानीय निकायमा कारोबारको इजाजत लिएकाले धितो राखेर ऋण पनि व्यवसायीले लगानी गर्दै आएको उनको भनाइ छ ।

सुन धितो राखेर ऋण लगानी गर्नेहरूले मासिक २ देखि ३ प्रतिशतका दरले वार्षिक २४ देखि ३६ प्रतिशतसम्म ब्याज असुली गर्ने गरेका छन् । गृह मन्त्रालयले मिटरब्याजीको खोजी गर्न ७७ वटै जिल्लामा गत वर्ष प्रशासन कार्यालयलाई परिपत्र गरेको थियो ।

जिल्ला प्रशासन कार्यालयहरूमा मिटरब्याजी भनेर काजग गरी ऋण लगानी गर्नेहरूका मात्रै उजुरी परेका थिए । जमिन राखेर गरिने ऋण लगानी जत्तिकै सुन राखेर अबैध कारोबार भइरहेको छ ।

मोरङका प्रहरी उपरीक्षक नारायणप्रसाद चिमरियाले चोरीको सुन खरिद गर्ने र धितो जमानीमा अबैध ऋण लगानी गर्नेहरू बिरुद्ध उजुरी आए कारवाहीको दायरामा ल्याउने बताए ।