सुनकोशीमा फेरी दुर्घटना हुँदा नदीमा डुब्यो बस, चालकको उद्दार

विराटनगर । उदयपुर र भोजपुर जोड्ने रानीटारमा फेरी दुर्घटना हुँदा त्यसमाथि तारिंदै गरेको बस डुबेको छ । फेरीमा राखेर तार्दै गरेको बा ३ ख ६३३९ नम्बरको यात्रु बस सुनकोशीमा डुबेपछि बसका चालकको उद्दार गरिएको छ । 

बसका यात्रुहरूलाई भने ओरालिएका कारण ठुलो क्षति हुनबाट जोगिएको जनाइएको छ । 

यहाँ प्लाष्टिकको ड्रमलाई बाँधेर फेरी बनाइएको थियो । त्यसैमाथि राखेर बस तार्ने क्रममा फेरीलाई तान्ने तार चुडिएपछि सन्तुलन बिग्रिएर दुर्घटना भएको जनाइएको छ । उदयपुरबाट भोजपुरतर्फ बस तार्ने क्रममा दुर्घटना भएको प्रहरीले जनाएको छ ।

डुबेको फेरी संचालक समेत रहेका रत्न तामाङको हो । बस इटहरीबाट भोजपुरको आमचोकतर्फ जाँदै इलाका प्रहरी कार्यालय बेल्टारले जनाएको छ ।

हिउँदको समयमा सुनकोशीमा पानीको बहाव घट्ने भएका कारण स्थानीयले नै प्लाष्टिकका ड्रमलाई जोडेर करीव २५ लाख रुपैयाँको लागतमा फेरी निर्माण गरेका थिए । एउटा तारेको उनीहरूले दुई हजार रुपैयाँसम्म लिने गरेका थिए ।