भोजपुरलाई हराउँदै झापा–११ सेमिफाइनलमा

बेलबारी । मोरङको बेलबारीमा जारी सातौँ बेलबारी आरजु राइस गोल्डकप फुटबल प्रतियोगिता अन्तरगत आइतबारको खेलबाट झापा–११ फुटबल क्लब सेमिफाइनलमा प्रवेश गरेको छ ।

भोजपुर फुटबल क्लबलाई ३–० ले हराउँदै झापाले सेमिफाइनल सुरक्षित गरेको हो ।

खेलको पहिलो मिनेटमै झापाका निरज कार्कीले भोजपुर विरुद्ध गोल गरे । निरजले पोष्टमा प्रहार गरेको गोल भोजपुरका खेलाडी सञ्जय लिम्बूले गोललाइनबाट ब्याकपास गरेका थिए । तर उक्त बललाई निरजले नियन्त्रणमा लिँदै जाली चुमाए ।

मध्यान्तर अघि १–० ले अग्रता कायम गरेको झापाले ७५ औं मिनेटमा गोल थप्यो । प्रदीप बुढाथोकीले मैदानको मध्यभागबाट प्रहार गरेको बल गोलमा परिणत भएको हो । अतिरिक्त समयमा झापाका प्रदीप बुढाथोकीले टोलीका लागि गोल गर्दै टिमलाई सेमिफाइनल यात्रा तय गराए ।

आइतबारको खेलमा झापाका निरज कार्की म्यान अफ द म्याच घोषित भए । उनलाई शिवसतासी  नगरपालिकाका मेयर रोशन थोप्राले नगद ५ हजार र ट्रफी प्रदान गरे । 

सोमबारको खेल चित्लाङ फुटबल क्लब काठमाडौँ र राजारानी फुटबल क्लब धनकुटा बिच खेल हुने आयोजकले जनाएको छ ।

यो प्रतियोगिताका विजेताले ८ लाख नगद र गोल्डकप तथा उपविजेताले नगद ५ लाख नगद पाउने जनाइएको छ ।