ट्याक्टर चोर्ने रसाईली पक्राउ

विराटनगर । संखुवासभाको पाँचखपन नगरपालिका–६ वानामा राखिएको ट्याक्टर रातको समयमा चोरीमा संलग्न रहेको आरोपमा संखुवासभाकै खाँदवारी नगरपालिका–८ सार्कीडाँडाका २० वर्षीय गजेन्द्र रसाईली पक्राउ परेका छन् । 

भोजपुरको षडानन्द नगरपालिका–६ कुमालगाउँका ५६ वर्षीय नर बहादुर कुमालको नाममा दर्ता रहेको प्र. १–०२–००३ त २७५५ नम्बरको ट्याक्टर गत मंगलबार राती चोरी भएको थियो । ट्याक्टर चोरिएको जानकारी पाएपछि गरेको खोजतलासका क्रममा खाँदवारी–१ स्थित आर्मी क्याम्प नजिकै वेवारिसे अवस्थामा ट्याक्टर भेटिएको प्रहरीले जनाएको छ ।

जिल्ला प्रहरी कार्यालय संखुवासभाका सूचना अधिकारी प्रहरी निरीक्षक अभिशेक कुमार श्रेष्ठका अनुसार ट्याक्टर चोरिएको जानकारी पाउनासाथ खटिएको प्रहरी टोलीले खोजतलास गर्ने क्रममा बेवारिसे अवस्थामा ट्याक्टर फेला पारेको र थप अनुसन्धानका ट्याक्टर चोरीमा रसाईलीको संलग्नता खुलेको जानकारी दिए ।

ट्याक्टर बेवारिसे छाडेर भागेका रसाईलीलाई प्रहरीले बिहीबार खाँदबारी नगरपालिका–९ तुम्लिङटारमा लुकिछिपी बसेको अवस्थामा पक्राउ गरेको जनाइएको छ ।

उनीमाथि चोरी अभियोगमा संखुवासभा जिल्ला अदालतबाट ६ दिनको म्याद थप गरी थप अनुसन्धान भइरहेको जनाइएको छ ।