ओलीले लोभ्याएपछि ‘ब्याक’ भए गौतम

विराटनगर । एमालेमा अहिले प्रचार विभाग प्रमुख रहेका संखुवासभाका नेता राजेन्द्र गौतम यसपटक पार्टीको पदाधिकारी बन्न चाहन्थे ।

अध्यक्ष केपी ओलीका हरेक कमजोरी लुकाउन दिनरात खटिए पनि उनलाई पदाधिकारीमा ओलीले पत्याएनन् । त्यसपछि गौतमले ओलीको वरिपरि घुमेर बस्नेहरूको कोपभाजनमा परेको भन्दै उपमहासचिवमा स्वतन्त्र उम्मेद्वारी दिएका थिए ।

आफू निष्ठाको राजनीति गर्ने भन्दै उनले उम्मेदवारी फिर्ता नलिने बताएका गौतम अन्ततः अडानमा टिकिरहन सकेनन् । उनलाई अध्यक्ष ओलीले राष्ट्रियसभाको लोभ देखाएपछि उनले उम्मेद्वारी फिर्ता गरेका स्रोतको भनाइ छ ।

गौतमलाई ओलीले राष्ट्रिय सभामा लाने लोभ देखाएपछि उम्मेदवारी फिर्ता लिएको एमाले उच्च स्रोतले जानकारी दिएको छ । 

‘अध्यक्षले उहालाई राष्ट्रियसभामा लैजाने वचन दिनुभएको छ, उहा उम्मेदवारी फिर्ता लिन राजी हुनुभएको छ’ स्रोतले भन्यो । 

गौतमले २०७९ को निर्वाचनमा संखुवासभामा पराजय भोगेका थिए । कांग्रेस नेता दीपक खड्कासंग उनी पराजित भएका थिए ।