एकीकृत समाजवादी मोरङको नेतृत्व चयनमा भएन सहमति

विराटनगर । नेकपा (एकीकृत समाजवादी) मोरङ जिल्ला कमिटीको नेतृत्व चयन तीन दिन बित्दासमेत हुन सकेको छैन । नेतृत्व चयनको प्रक्रियाका लागि निर्वाचन कमिटी गठन भए पनि पार्टी नेताहरूले सहमति गराउन पर्खाएका कारण मतदान प्रक्रिया अघि बढेको छैन ।

बुधबार अध्यक्ष पदका लागि नौ जनाले मनोनयन दर्ता गराएका थिए । 

विराटनगरको होटल मनास्लु इनमा पार्टी अध्यक्ष माधवकुमार नेपालले मंगलबार नवौं जिल्ला अधिवेशनको उद्घाटन गरेपछि नयाँ नेतृत्व चयनको प्रक्रिया अघि बढेको थियो । 

उद्घाटनमा नेताहरूले सहमतीय प्रक्रियाबाटै नेतृत्व चयन सकिने बताएका थिए । सहमतिको पहल नभएपछि आकांक्षीहरूको उम्मेदवारी दर्ता गराइएको हो । तर त्यसपछि पनि सहमतिको खोजी गर्ने भन्दै अधिवेशन स्थलमा जारी रहेको पार्टीको नेतृत्व चयनको प्रक्रिया पार्टी कार्यालयमा पुर्‍याइएको छ ।

सहमति गराउने बुधबार दिनभरिको प्रयास असफल भएपछि अध्यक्ष पदका लागि निर्वतमान अध्यक्ष चन्द्रवीर राईसहित उद्वव पोखरेल, दीपक ढकाल, लक्ष्मीकुमार श्रेष्ठ, कविराज घिमिरे, पुरुषोत्तम सुवेदी, हितबहादुर थापा, पदम सुब्बा र ध्रुव डाँगीले बुधबार साँझ मनोनयन दर्ता गराएका थिए । त्यसपछि रातभरि र बिहीबार दिनभरीसम्म सहमतिकै खोजी भइरहेको नेताहरूले बताएका छन् ।

‘अहिले पनि पार्टीले सहमति गराउने प्रयास गरिरहेको छ’ अध्यक्ष मण्डलको सदस्य रहेकी केन्द्रीय सदस्य निमल ढुंगेलले भनिन्, ‘हामी त्यही काम गरिरहेका छौं, तर सहमति भइसकेको छैन, पार्टी कार्यालयमा नेताहरूले छलफल गरेर निर्वाचन समितिमा पनि छलफल भइरहेको छ ।’

९१ सदस्यीय जिल्ला कमिटीको चयन गर्नका लागि साढे ४ सय बढी प्रतिनिधि चयन भएर अधिवेशनको बन्दसत्रसम्म सहभागी भएका थिए । तर नेतृत्व चयन प्रक्रिया लम्बिएका कारण अधिकांश प्रतिनिधिहरू आफ्नो घर फर्किइसकेका छन् ।

अध्यक्षसहित सात पदाधिकारीका लागि २१ जनाले मनोनयन दर्ता गराएका थिए । ६ वटा निर्वाचन क्षेत्रमध्ये केही क्षेत्र, जनवर्गीय संगठन र अन्य क्लष्टरबाट प्रतिनिधित्व गर्ने सदस्य पदमा भने सर्वसम्मत भइसकेको निर्वाचन कमिटीले जनाएको छ ।