सरस्वती मन्दिरमा जाजू परिवारले राखे खानेपानी प्लान्ट

विराटनगर : यहाँको औद्योगिक घराना जाजू ग्रुपले विराटनगर–७ स्थित सरस्वती टोलमा रहेको सरस्वती मन्दिरमा आधुनिक फिल्टर मेसिन जडित खानेपानी प्लान्ट स्थापना गरेको छ । तीन लाख बराबरको लगानीमा स्थापित उक्त प्लान्टको बिहीबार जाजू परिवारले पूजाआजा गरेर शुभारम्भ गरेका छन् । 

रमपम चाउचाउका उत्पादक एसियन थाइफुड्सलगायत विभिन्न औद्योगिक प्रतिष्ठानका सञ्चालक महेश जाजूको परिवारले आफ्ना स्वर्गीय मातापिता रामानन्द जाजू र हरप्यारीदेवी जाजूको स्मृतिमा आधुनिक फिल्टर मेसिन जडित खानेपानी प्लान्ट स्थापना गरेका हुन् ।

चौबीसै घण्टा चिसो पानी आउने उक्त फिल्टर प्लान्ट जाजू परिवारले मन्दिर व्यवस्थापन समितिका अध्यक्ष कमलप्रसाद भट्टलाई हस्तान्तरण गरेका छन् । हस्तान्तरण कार्यक्रममा विराटनगर महानगरपालिका वडा नं. ७ का अध्यक्ष मधुबाबु तिवारी, माहेश्वरी समाज विराटनगरका अध्यक्ष घनश्याम काबरासहित जाजू परिवारका अन्य सदस्यहरू उपस्थित थिए ।