मावली आएकी किशोरीको हत्या

विराटनगर । मावली आएकी किशोरीको हत्या गरेर पुरेको अवस्थामा शव फेला परेपछि आठ जनालाई प्रहरीले अनुसन्धानको दायरामा ल्याएको छ । मावलीघरका सबैलाई नियन्त्रणमा लिएर प्रहरीले अनुसन्धान थालेका हो ।

भारतको बिहारबाट विराटनगर–५ स्थित मावली घरमा आएकी बालिकाको शव गाडेको एक सातापछि सडेको अवस्थामा शुक्रबार प्रहरीले निकालेको थियो । 

बालिकाको हत्यामा मावली घरका सबै सदस्यको संलग्नता रहेको प्रहरीको अनुमान छ । मोरङका प्रहरी नायव उपरीक्षक वेदप्रकाश जोशीले नियन्त्रणमा लिइएकाहरू माथि अनुसन्धान भइरहेको बताए । 

स्थानीय सरजुग मण्डलको घरपछाडि उनकी नातिनी १४ वर्षीया चाँदनी यादवको शव खनेर निकालिएको हो । 

भारतको छप्राहा जिल्ला घर भएकी बालिकालाई उनकै बाबुआमा  लालमोहन र राजकुमारी यादवले एक महिनाअघि मावली घरमा छाडेका थिए । माघ ११ गते राति बालिकाको हत्या गरी शव गाडेको खुलेको छ ।  

हत्यामा बालिकाकी आमा, हजुरबुबा र मावली परिवारका सबै सदस्यको संलग्नता रहेको प्रहरीको प्रारम्भिक अनुसन्धानले देखाएको छ । 

बालिका भारतमा कुनै युवकसँग नजिक रहेकाले झारफुक गरेर युवकबाट टाढा राख्न विराटनगरस्थित मावलीमा ल्याइएको थियो । 

मावलीमा एक महिनादेखि बस्दै आएकी बालिकालाई स्थानीयले नदेखेपछी शंका गरेका थिए ।

छोरी छाडेर भारत गएकी आमा पुनः आएपनि एक्लै घर फर्किनु र बालिका पनि मावलीमा नहुनुले स्थानीयलाई शंका लागेर सोधपुछ गरिएको थियो । 

मावलीले स्थानीयलाई बालिका भारत घरमा रहेको बताउनु र भारतमा रहेका बाबुले छोरी मावलीस्थित नेपालमै रहेको बताउनुले स्थानीयमा हत्याको शंका बढेको थियो ।

बालिका हत्या र शव गाडेको विषयलाई अति गम्भिर रुपमा लिएर अनुसन्धान भइरहेको प्रहरी उपरीक्षक नारायण चिमरियाले बताएका छन् । 

अनुसन्धानको दायरामा आएका सबैबारे सूक्ष्म अध्ययन गरेर आइतबार अदालतबाट म्याद थप गरिने उनको भनाइ छ । पक्राउ परेका आठमध्ये केहीको संलग्नता नभए जस्तो पनि देखिएको प्रहरीको अनुसन्धानले देखाएको छ ।