दाहाल प्रतिष्ठानमा घटस्थापना

विराटनगर । नेपालीहरूको महान् चाड बडा दशैं बिहीबारबाट सुरु भएको अवसरमा दाहाल प्रतिष्ठान विराटनगरद्वारा घटस्थापनाको शुभसाइतमा वैदिक विधिपूर्वक देवी दुर्गाको पूजा गरेर यसको सुरुवात गरिएको छ । 

दाहाल प्रतिष्ठानले सोमबार दिनको ११ः५५ को शुभसाइतमा विराटनगरस्थित आफ्नै भवनमा शक्तिकी अधिष्ठात्री देवी दुर्गाको आह्वान गरी पूजा गर्दै जमरा राखेको छ । 

सप्तकोशी नदीको जल ल्याएर विधिपूर्वक जौ, मकै र धानको जमरा छरिएको हो ।

दाहाल प्रतिष्ठानको दशैं घरमा शङ्ख, घण्टा र डमरु बजाएर दुर्गा भगवतीको पूजा, आराधना गरिएको आयोजक कमलराज दाहालले बताए ।   

हिन्दु परम्पराअनुसार घटस्थापनाको दिन विधिपूर्वक द्वीप, गणेश र कलशको पूजा गरेर जमरा राखिन्छ । 

यसरी विधिपूर्वक स्थापना गरिएको घडामाथि शक्ति स्वरूप दुर्गा भगवतीको पूजा गरिने भएकाले यस दिनलाई घटस्थापना पनि भनिने गरिएको हो ।

घटस्थापनाको दिन रोपिएको जमरालाई विजया दशमीको दिन दुर्गा भगवतीको प्रसादको रूपमा ग्रहण गर्ने प्रचलन छ ।