कोशी अस्पतालभित्रको बेमेल, प्रमुखसँगको असन्तुष्टिले सेवा प्रभावित

विराटनगर । कोशी प्रदेशकै ठूलो सरकारी अस्पतालमा प्रमुख मेडिकल सुपरिण्टेण्डेण्ट (मेसु) सँगको सहकार्य नहुँदा विषेशज्ञ सेवामा असर परेको छ । 

कोशी अस्पतालका प्रमुख र अन्य चिकित्सक तथा कर्मचारीबीचको बेमेलको असर बिरामीलाई पनि देखिएको छ ।

अस्पतालमा प्रमुखका रुपमा डा. रुणा झा आएपछि उनको नेतृत्व गर्ने क्षमता र नियमित काम गरिरहेका विज्ञ चिकित्सकहरू बीच तालमेल मिलेको छैन । 

उनलाई स्वास्थ्य मन्त्री प्रदीप पौडेलले कोशी अस्पताल प्रमुख बनाएपछि पुराना र अस्पताललाई अभिभावकत्व दिइरहेका चिकित्सकहरू बीच मनमुटाव सुरू भएको थियो । प्रमुख झा प्रशासकका रूपमा विज्ञ चिकित्सहरूसँग प्रस्तुत हुने गरेकाले यो समस्या आएको बताइएको छ ।

अग्रज र समान हैसियतका चिकित्सकलाई बेवास्ता गर्दै झाले एकल रूपमा निर्णय गरेर समन्वयभन्दा पनि आदेशको शैली अपनाउने गरेकाले अस्पतालमा समस्या देखिएको कर्मचारी बताउँछन् । जसका कारण अस्पतालका सबै वार्डहरूमा बिरामीले पाउने सेवामा प्रभाव परेको देखिन्छ । 

अस्पतालमा भौतिक संरचनाको अभावले बिरामीलाई सेवामा प्रभाव परेपनि अन्य कारणले असुविधा नदेखिएको कोशी अस्पतालका सूचना अधिकारी गजेन्द्र यादवको भनाइ छ ।

प्रक्रियामा भन्दा पनि मेसुले दबाबमा सेवा दिन लगाउने गरेकाले चिकित्सकहरूले अघोषितरूपमा अस्वीकार गर्दै आएका छन् । 

चिकित्सक र अस्पताल कर्मचारीबीच असहज वातावरणमा रहेकी झाको अगुवाईमा सोमबार स्वास्थ्य मन्त्री पौडेलले दुई वटा सेवाको शुभारम्भ गरेका थिए । 

मन्त्री उपस्थित कार्यक्रममा अस्पतालका पूर्व प्रमुखहरूको नाम नै नलिएकोमा अस्पतालमा रहेका ठूलो संख्याका कर्मचारी र स्वास्थ्यकर्मी असन्तुष्ट छन् । 

कार्यक्रम सञ्चालकले अन्य कर्मचारीलाई आसन ग्रहण गराउँदा अगाडि रहेका तीन जना पूर्व प्रमुखहरूको नामै लिएनन् । डा. लक्ष्मीनारायण यादव, डा. यज्ञराज खरेल र डा. रविनराज सिंह कार्यक्रममा उपस्थित भए पनि उनीहरू दर्शक दिर्घामा दिए । 

बरियतामा कनिष्टहरू मन्चमा रहे तापनि नाममा सम्बोधनसम्म नभएकाले उनीहरू कार्यक्रममा पूरा अवधि बसेका थिएनन् । कार्यक्रम सञ्चालकले अग्रजहरूको नाम लिए पनि ‘फलानो आउँदैछ’ भन्ने शब्द प्रयोग गरेका थिए ।

अस्पताल विकास समितिका सदस्यहरूलाई पनि कार्यक्रममा एकमुष्ट आसनग्रहण गराइएको थियो । 

अस्पताल विकास समिति सदस्य राजनीतिक नियुक्ति भएकाले वरियतामा अस्पताल प्रमुखभन्दा माथि हुने व्यवस्था छ । 

प्रमुख प्रमुख झाको प्रशासकीय व्यवहारका कारण विकास समिति सदस्य हरि भट्टराई अस्पताल जान छाडेका छन् । अस्पतालमा कार्यकारी प्रमुखको भूमिकामा मेसु भए पनि निगरानी र सञ्चालन गर्ने विकास समिति अध्यक्षको भूमिका प्रष्ट नभएको विकास समिति सदस्य किशोर पाण्डे बताउँछन् । 

विकास समिति अध्यक्ष डा. फरवाड सिलवाल आन्तरिक समस्याका कारण बिरामीमा प्रभाव परेको आफूले थाहा नपाएको बताए । बरू पछिल्लो समयमा अस्पतालले सेवा विस्तार गर्दै लगेको उनको भनाइ छ । 

‘पुरानो गए नयाँ प्रमुख आउँछ भन्नेहरू पनि छन् यहाँ’ अस्पताल प्रमुख झाले भनिन्– ‘म छिटो गई दिए हुन्थ्यो भन्ने होला, आफू मेसु बन्न पाए हुन्थ्यो भन्ने होला कसैलाई ।’ 

पुराना प्रमुखले गर्न नसकेको काम आपूmले गरेकाले कतिपयले समूह बनाएर आफ्नो विरोध गरेको हुन सक्ने उनको भनाइ छ ।