देशभरका शिक्षकहरू काठमाडौं केन्द्रीत आन्दोलनमा

विराटनगर । नेपाल शिक्षक महासंघ राष्ट्रिय समितिले नेतृत्व गरेको अनिश्चितकालीन शिक्षक आन्दोलन चर्किएको छ । बुधबारदेखि शिक्षकहरूले काठमाडौं केन्द्रीत आन्दोलन सुरु गरेका हुन् ।

प्रस्तावित विद्यालय शिक्षा ऐन २०८० लाई तत्काल संसदबाट पारित गर्न वा अध्यादेशबाट भएपनि ल्याउन माग गर्दै शिक्षकहरूले माग गर्दै आएका छन् । सरकारले बुधबारदेखि संसद अधिवेशन अन्त्य गरेपछि संसदमा ऐन आउने सम्भावना भने तत्काललाई टरेको हो ।

शिक्षा ऐन पारित गर्न माग गर्दै शिक्षकहरूले पालिकास्तरदेखि केन्द्रसम्म सडक आन्दोलनमा चर्काउँदै आएका थिए । उनीहरूले शिक्षा ऐन २०२८ ले मुलुकमा शिक्षाको विकासमा बाधा पु¥याएको र शिक्षकहरूको हकहित स्थापित गर्न नसकेको आरोप लगाउँदै आएका छन् ।

शिक्षकहरूले कक्षा १० को माध्यमिक शिक्षा परीक्षा (एसईई) सम्पन्न भइसकेको अवस्थामा उत्तरपुस्तिका परीक्षण सम्परीक्षण कार्य सुरु हुने बेलामा पनि आन्दोलनमा उत्रिएका हुन् । उनीहरूले यस्तो बेलामा उत्तरपुस्तिका परीक्षण नगर्ने बताए । 
महासंघले घोषणा गरेको अनिश्चितकालिन आन्दोलनमा सहभागी हुन जिल्लाजिल्लाबाट शिक्षकहरू काठमाडौं पुगेको जनाइएको छ ।

नेपालमा सामुदायिक शिक्षामा २ लाख ५० हजारको संख्यामा शिक्षक र विद्यालय कर्मचारी कार्यरत रहेका छन् । उनीहरूले १८ प्रकारले शिक्षकहरू नियुक्ति गरेका कारण शिक्षकहरूको समस्या चर्किंदै गएको शिक्षक संघ संगठनका नेताहरू बताउँछन् ।

पेशागत हकहित लगायतको मागमा अडिग रहेर आन्दोलनमा उत्रिएका शिक्षकहरूले बुधबार माइतीघर मण्डलादेखि नयाँ बानेश्वरसम्म जुलुस प्रदर्शन गरेका छन् ।

यसअघि पनि शिक्षकहरूले काठमाडौं केन्द्रीय आन्दोलत गरेपनि सरकारसँग सहमति गर्ने बेलामा भने शिक्षकका पेशागत संघ संगठनहरू विभाजित बनेका थिए ।

उनीहरूले सरकारसँग अलग अलग सम्झौता गरेपछि आन्दोलन टुंगिएको थियो । तर उक्त समहमति अहिलेसम्म कार्यन्वयन हुन नसकेको अवस्थामा पुनः शिक्षकहरूले आन्दोलन घोषणा गरेका हुन् ।