संस्थापन भर्सेस ढकाल समूहबीच प्रतिष्पर्धा निश्चित

विराटनगर । संगठन कमिटीका भरमा चलिरहेको नेकपा एमाले मोरङ १० औं जिल्ला अधिवेशनमार्फत फागुनमा नयाँ नेतृत्व चयन गर्ने तयारीमा जुटेको छ । फागुन १७, १८ र १९ गते गरी तीन दिनसम्म चल्ने अधिवेशनबाट जिल्ला पार्टीको अध्यक्ष बन्न आधा दर्जनभन्दा बढी आकांक्षी दौडधुपमा छन् ।

एमाले मोरङले जिल्ला अधिवेशनमा सहभागी हुने प्रतिनिधिहरू फागुन १० मा एकैचोटी छान्ने तयारी गरेको छ । जिल्लाका १७ वटै स्थानीय तहका १५९ वटा वडाबाट छानिने एक हजार हाराहारी प्रतिनिधिले जिल्लाको नयाँ नेतृत्व चयन गर्नेछन् ।

यद्यपि चुनावी प्रतिष्पर्धामार्फत जिल्ला नेतृत्व चयन हुन्छ कि हुन्न भन्ने विषय चाहिँ प्रष्ट छैन । अहिले संस्थापनमा देखिएका नेताहरूले ‘सकेसम्म सहमतिमा नेतृत्व चयन हुने’ बताइरहेका छन् ।

विराटनगरमा हुने अधिवेशनबाट जिल्लाको पार्टी अध्यक्ष बन्न प्रयास गर्ने नेताहरूको सूची एमालेमा लामो देखिएको छ ।

पहिले जिल्ला कमिटी उपाध्यक्ष र पछिल्लो समय संगठन कमिटीको अध्यक्ष बनेका बाबुराम कार्की, जिल्ला समन्वय समिति मोरङका प्रमुख अजम्बर राई, प्रदेशका पूर्व प्रदेश सांसद राजकुमार ओझा, विराटनगर महानगर कमिटीका पूर्वअध्यक्ष सागर थापा, जिल्ला सदस्य इरान राई र अहिले पार्टी महानगर इन्चार्ज रहेका पर्शुराम बस्नेत, अर्का नेता महेश भट्टराईलगायतको नाम जिल्लाको भावी अध्यक्षका रुपमा प्रचारमा छ । 

यीमध्ये संगठन कमिटी अध्यक्ष बाबुराम कार्की, राजकुमार ओझा र पर्शुराम बस्नेत संस्थापन समूहबाट जिल्ला अध्यक्ष बन्ने दौडमा रहेका नेताहरु हुन् । 

आफूलाई संस्थापन समूहकै दाबी गर्ने तर प्रदेशमा रहेका धेरैजसो स्थायी कमिटी सदस्य तथा प्रदेश अध्यक्षसहितका नेताहरूले भने संस्थापनइतर ठान्ने (विनोद ढकाल समूह) बाट अजम्बर राई, सागर थापा, इरान राई र महेश भट्टराई अध्यक्ष बन्ने लाइनमा  रहेका नेताहरू हुन् । दुवै समूह सहमतिमा एक–एक जनालाई अघि सार्ने कसरतमा रहेको एमाले नेताहरू बताउँछन् ।

एमाले कार्यकर्ताहरूका अनुसार मोरङमा पार्टी मुख्यतः दुई समूहमा विभक्त छ । जसमा एउटा समूहको नेतृत्व विनोद ढकालले गरिरहेका छन् भने अर्को समूहको नेतृत्व भानुभक्त ढकाल, जीवन घिमिरे, ऋषिकेश पोखरेल लगायतका नेताहरूले गरेका छन् । दुवै पक्ष आफूहरू अध्यक्ष केपी शर्मा ओली समूहमै रहेको दाबी गर्छन् ।

तर, पछिल्लो समय अध्यक्ष ओली समर्थक प्रदेशका नेताहरू र विनोद ढकालबीच कोशीमा तिक्तता बढ्दो छ । मोरङको पार्टी संगठनमा बलियो पकड कायम गरेका ढकाल पक्षका नेताहरूलाई रोक्नकै लागि अधिवेशन पटक–पटक सारिएको आरोप उक्त पक्षले लगाउँदै आएको छ ।

पार्टीको मोरङ जिल्लाको १० औं  अधिवेशन मूलतः संस्थापन समूह र विनोद ढकाल पक्षबीचको लडाइमा परिणत हुने कार्यकर्ताहरू बताउँछन् । केन्द्रीय समितिमा रहेका विनोद ढकाल यसअघि कोशी अध्यक्षमा घनश्याम खतिवडासँग पराजित बनेका नेता हुन् । 

त्यसबेला ढकाललाई हराउन मुख्यमन्त्री हिक्मतकुमार कार्कीदेखि पूर्वमुख्यमन्त्री शेरधन राई, भानुभक्त ढकालसहितका नेताहरू लागेका थिए भने पहिले फरक समूहमा रहेका भीम आचार्य एक्लै ढकालका पक्षमा उभिएका थिए । यस पटकको अधिवेशनमा प्रदेश अधिवेशनको टिमबीच नै जिल्ला नेतृत्व हात पार्न प्रतिष्पर्धा हुने बुझाइ एमाले वृत्तमा छ । 

सार्वजनिक रुपमा अध्यक्षको दाबी गरिरहेकाहरूमध्ये संस्थापन पक्षले बाबुराम कार्कीलाई अध्यक्षका रुपमा अघि सार्ने निश्चित जस्तै भएको सो समूहका नेताहरू बताउँछन् । 

‘सहमतिमा भए पनि, चुनाव भए पनि हामीले बाबुरामजीलाई नै अघि सार्ने हो’, सो समूहका एक नेताले भने । कार्कीले पनि त्यस्तै अभिव्यक्ति दिए । 

‘अधिवेशनमा तपाई अध्यक्षको दाबेदार हो ?’ भन्ने उद्घोषको प्रश्नमा कार्कीले भने ‘हो, सहमति हुँदा मेरै नाममा होस् भनेर नेताहरूलाई भनेको छु । अन्यथा चुनाव लड्न पनि तयार हो ।’ संगठन कमिटीको अध्यक्षबाट पूरा कार्यकालको अध्यक्ष बन्ने तयारीमा आफू रहेको उनले बताए ।

नेता ढकाल पक्षबाट पनि जिसस प्रमुख अजम्बर राई र सागर थापामध्ये एक जनाले अध्यक्षमा प्रतिष्पर्धा गर्ने स्रोतको भनाइ छ । उनीहरूमध्ये राईले भने ‘मेरो अध्यक्षमा खुला दाबी छ । सहमति हुँदा मेरै नाममा भए बेग्लै कुरा नत्र म चुनाव लड्न तयार भएर बसेको छु ।’ 

ढकाल समूहबाटै अध्यक्षमा दाबी गरिरहेका सागर थापा यसअघि महानगर अध्यक्ष थिए । बाबुराम कार्की नेतृत्वको जिल्ला कमिटीले उनलाई मानगढ खानेपानी विवादमा कारबाही गरेको थियो । 

आफूले त्यही ‘अन्याय र अपमानविरुद्ध’ अधिवेशनमा उम्मेद्वारी दिने थापाको भनाइ छ । ‘जिल्ला अध्यक्षमा मेरो दाबी छ, रहन्छ’, थापाले भने ‘तर, सहकार्य र सल्लाहको निचोडलाई म आत्मसात गर्नेछु ।’ यसो भनेर आफू लचक रहेको संकेत थापाले गरेका छन् ।

पार्टीको जिल्ला अधिवेशन इमान्दार कार्यकर्ता र बेइमान नेताहरूबीचको लडाइमा परिणत हुने उनको घोषणा छ । 

‘बेइमान नेताहरूबाट भएको अपमानका विरुद्ध इमान्दार कार्यकर्ताहरू उभिनेछौं’, उनले भने ‘अन्ततः जीत इमान्दारहरूकै हुनेछ ।’ 

थापाले ‘सहकार्य र सल्लाह’ मान्ने भनेर लचकता देखाउनुको कारण टिमले अर्को महत्वपूर्ण जिम्मेवारीमा पठाउने निश्चित गरेको भनेर बुझ्नुपर्ने उनी निकट नेताहरू बताउँछन् । 

संस्थापन पक्षबाट अध्यक्षको दाबी गरिरहेका राजकुमार ओझाले भने सहमतिमा पाए अध्यक्ष हुने चुनावमा प्रतिष्पर्धा भने नगर्ने बताएको समूहका नेताहरूको भनाइ छ । ‘एकपटक तपाईले जिल्ला पार्टी हाँक्नुस् भन्ने कार्यकर्ताहरूको माग छ’, ओझाले दाबी गरे ‘मेरो उम्मेद्वारी हुन सक्छ । म उम्मेद्वार बन्दा अरु उठ्नुहुन्न होला भन्ने विश्वास छ ।’

१८ हजार ५ सय ७६ जना पार्टी सदस्य रहेको एमाले मोरङमा जिल्ला अधिवेशन गराउने मुख्य कार्यादेशसहित गठन भएको जिल्ला  संगठन कमिटीले नै लामो समय बिताइसकेको छ । पार्टीको विधानले तोकिदिएको अवधि भने संगठन कमिटीले गुजारिसकेको छ ।

एमाले मोरङका तत्कालीन अध्यक्ष ऋषिकेश पोखरेल नेतृत्वमै २०८० जेठमा अधिवेशन आयोजक कमिटी बनेको थियो । आयोजक कमिटी बनेकै पनि एक वर्षपछि मात्रै सांसद पोखरेलले पद त्यागेका थिए । र, २०८१ जेठमा बाबुराम कार्की नेतृत्वमा संगठन कमिटी बनेको थियो । 

एमालेको विधानले संगठन कमिटीको मुख्य काम आफ्नो अधिवेशन सम्पन्न गराउनुपर्ने किटान गरेको छ । विधानअनुसार संगठन कमिटीको अवधि ६ महिनाको हुने उल्लेख छ । जेठ १८ मा बनेको कमिटीको अवधि पूरा भइसकेपछि अधिवेशन गराउन विनोद ढकाल पक्षले निरन्तर दबाब दिदै आएको थियो ।