बैदेशिक रोजगारी लगाइदिने नाममा रकम लिएर फरार भएका पौडेल घर फर्किएको थाहा पाएर पीडितले गरे घेराउ

विराटनगर । वैदेशिक रोजगारीको नाममा बेरोजगार युवाहरूबाट  लाखौं ठगी गरी फरार रहेको आरोप लगाउँदै विराटनगरका एक व्यक्तिको घर पीडित पक्षले घेराउ गरेका छन् । 

ठगी गर्ने ब्यक्ति घर फर्किएको सूचना पाएपछि प्रहरी र पीडितले ती ब्यक्तिको घरसमेत खानतलासी गरेका छन् ।

यूरेपेली मुलुकको लिथुवानिया वा लक्जम्बर्गमा छोरा मनिषलाई रोजगारी लगाईदिने भनेपछि मोरङ बुढीगंगा गाउँपालिका–२ का मधुकर कार्कीले विराटनगर–८ मधुमारा हाम्रोचोकका प्रसन्न पौडेललाई साढे ८ लाख नगद दिएका थिए ।

कार्कीको भनाइ अनुसार छोराको बैदेशिक रोजगारीका निम्ति तत्कालै नगद दिनुपर्ने अवस्था आएपछि उनले आफुले गरिखान खरीद गरेको ट्रक बेचेर पौडेललाई रकम दिएका थिए ।

यद्यपि कार्कीको सो सपना तुषारापात भएको छ । रकम बुझेर पौडेल सम्पर्क विहीन भएपछि कार्कीको अवस्था छांगाबाट खसेजस्तै भएको छ । 

वैदेशिक रोजगारीमा लगिदिने भन्दै पौडेलले कार्कीका छोरा मनिषका साथै सालो सुरेन्द्र खड्का र भाञ्जा सुमन बुढाथोकीबाट समेतगरी झण्डै २४ लाख रकम ठगी गरी बेपत्ता भएका हुन् ।

पौडेलले कार्की परिवार मात्र नभई विराटनगर–४ का जुलीकुमारी कर्णसँग १० लाख, बुढीगंगा–२ का दिवस ठाकुरसँग ८ लाख १० हजारसहित थप दुईदर्जन बेरोजगार यूवाहरूलाई समेत बैदेशिक रोजगारीको प्रलोभन दिएर रकम ठगी गरी फरार भएको पीडितहरूले जानकारी दिएका छन् । 

पौडेलले लक्जम्बर्गमा जागिर लगाईदिने भनेपछि आफूले पौडेललाई ७ लाख रूपैया“ नगद दिएको विराटनगर–४ का सागर गुरूङले बताए । 

पौडेलले बेरोजगार युवाहरूबाट लाखौं ठगी गरेको हुनसक्ने पीडितहरूले दाबी गरेका छन् । पौडेल घर फर्किएको सूचना पाएपछि पीडितहरूले आइतबार बिहान साढे ३ बजे रातिबाटै मधुमारास्थित उनको घर घेराउ गरेका थिए । 

पीडित एकदर्जन बढी यूवाहरूले पौडेलको घर चारैतिरबाट घेरा हाली प्रहरीलाई खबर गरेका थिए । सूचना पाएर पुगेको जिल्ला प्रहरी कार्यालयको प्रहरी प्रहरी टोलीले पौडेलको घरमा खानतलासी समेत गरेको थियो । तर उनी घरमा भेटिएनन् । 

पौडेलका आफन्तले भने उनी सम्पर्कमा नरहेको दाबी गरेका छन् । पीडितहरूले २०८२ भदौ २ गते र त्यसपछिका विभिन्न मितिमा पौडेलबाट ठगिएको बिषयमा जिल्ला प्रशासन कार्यालयमा निवेदन दिइसकेका थिए । 

पौडेलले डेढ दर्जन यूवाहरूलाई जागिर लगाईदिन्छु भनेर जनही ८ देखि १० लाखका  दरले ठगि गरेको उजुरी आएको जिल्ला प्रशासन कार्यालय मोरङका सहायक प्रमुख जिल्ला अधिकारी सरोज कोइरालाले जानकारी दिए ।

उनले घटनाको अनुसन्धान गर्न सम्बन्धित निकायमा लेखी पठाइएको र पौडेलको खोजी भैरहेको बताए ।