भोजपुरको पारपानी गाउँमा आगलागी, ७ घर जले

विराटनगर । कोशी प्रदेशको पहाडी जिल्ला भोजपुरको टक्सार पारपानीमा सोमबार दिउँसो भएको आगलागीबाट ७ घर जलेका छन् । ८ वटा गोठ समेत जल्दा केही पशुचाैपाया पनि मरेका छन् ।

सोमबार विहानैदेखि चलेको हावाले स्थानीय इनामे सामुदायिक वन क्षेत्रमा लागेको डढेलो गाउँमा फैलिएर आगलागी भएको जनाइएको छ ।

सोमबार बिहान १० बजेतिर सुरु भएको आगलागी अझै नियन्त्रणमा आइनसकेको स्थानीय  सन्दीप राईले जानकारी दिए । 

आगलागीबाट भोजपुर नगरपालिका-१२ टक्सार पारपानी गाउँका शम्भु चापागाईं, सोभित श्रेष्ठ, गोमा दर्जी, राम बहादुर कार्की, गोपीकृष्ण धमला लगायतको घर पूर्ण रुपमा जलेका छन् ।

त्यस्तै गोविन्द चापागाईँ,रुद्र प्रसाद ढकाल, शेखर धमला, तीर्थप्रसाद सुवेदी, चन्द्र प्रसाद सुवेदी लगायतको घरमा पनि आगोले क्षति पुर्याएको राईले बताए । गोमा दर्जीको सुँगुर समेत आगलागीमा परी मरेको जनाइएको छ ।

आगलागी भएको वस्तीमा दमकल पुग्न नसकेका कारण नियन्त्रणमा कठिनाई भएको जनाइएको छ ।

स्थानीयबासी ततथा सुरक्षाकर्मीले आगो निभाइरहेको जनाइएको छ ।