दुर्व्यसनीविरूद्ध युवाहरूको एक महिने अभियान

बेल्टार । लागूपदार्थ दुर्व्यसनीविरूद्ध उदयपुरको चौदण्डीगढी नगरपालिकामा युवाहरूले एक महिने अभियान सुरू गरेका छन् ।

‘आजको युवा, नशा विरूद्धको योद्धा’ भन्ने नाराका साथ चौदण्डीगढी नगरपालिकाको बेल्टार बजारमा र्‍याली समेत निकालेका हुन् । र्‍यालीपछि बेल्टार बजारस्थित बसपार्कमा आयोजित कार्यक्रममा स्थानीय युवाहरूकै अग्रसरतामा लागूपदार्थ दुव्र्यसनविरूद्धको एक महिने अभियान थालनी गरेको घोषणा गरिएको हो ।

लागूपदार्थ दुर्व्यसनीविरूद्ध टोल र बस्तीमा पुगेर १३ देखि १९ बर्ष उमेर समुहका युवाहरू अन्तरक्रिया, अभिभावकहरू छलफल गरिने जनाइएको छ । अभियानको माध्यमबाट कुलत तथा दुर्व्यसनी न्युनीकरणका लागि महत्वपूर्ण सफलता हाँसिल गर्ने अपेक्षा लिएको क्लिन एण्ड ग्रीन सिटी बेल्टारका प्रमुख बिदुर राईले बताए ।

अभियानको उद्घाटन चौदण्डीगढी नगरपालिकाका मेयर कालुमान लामा, पूर्व नगर प्रमुख खगेन्द्र राई र वडाध्यक्ष अम्बरबहादुर खड्काले संयुक्त रूपमा गरेका थिए । 

उक्त अवसरमा मेयर लामाले सभ्य समाज निर्माणका लागि युवाहरूको महत्वपूर्ण भूमिका हुने बताए । उनले लागूऔषध दुर्व्यसनी रोक्नका लागि नगरपालिकाले सवैसँग सहकार्य गर्ने बताए । 

अभियानलाई सूर्योदय सुधार केन्द्र, चौदण्डीगढी रिकभरी टिम र क्लिन एण्ड ग्रीन सिटी बेल्टार लगायतका दुर्व्यसनीविरूद्ध कार्यरत संघसंस्थाहरूले सहयोग गरेका छन् ।

अभियानले दुर्व्यसनीका कारण समाजमा निम्तिने विभिन्न प्रकारका घटना न्यूनीकरणमा समेत सहयोग पुग्ने र असल समाज निर्माण हुने सहभागीहरूले बताए ।