देवानगञ्जका किसानलाई मोटर पम्प वितरण

विराटनगर । सुनसरीको देवानगञ्ज गाउँपालिकाले किसानलाई बिजुलीबाट पानी तान्ने मोटर पम्प वितरण गरेको छ ।

पालिकाले किसानहरूलाई सिँचाइमा सहज होस् भनेर पालिकाका ७ वटा वडाका ४ सय ८७ जना किसानलाई २ हर्ष पावरको मोटर पम्प वितरण गरेको हो । 

पालिका परिसरमा सोमबार आयोजित कार्यक्रममा गाउँपालिकाका अध्यक्ष बेचनप्रसाद मेहताले किसानहरूलाई पम्प हस्तान्तरण गरे ।

गाउँपालिकाले किसानहरुलाई ५० प्रतिशत अनुदानमा मोटर पम्प उपलब्ध गराएको हो । 

१७ हजार ८ सय ४० रुपैयाँ मूल्य पर्ने मोटरका लागि किसानहरूले ८ हजार ९ सय २० रुपैयाँ खर्चिएका छन् । 

देवानगञ्ज गाउँपालिकाका अधिकांश बासिन्दा कृषि पेशामा आश्रित रहेको र कृषि उपज नै उनीहरूको मुख्य आम्दानीको श्रोत भएकाले सिँचाइका लागि अनुदानमा मोटर पम्प उपलब्ध गराइएको गाउँपालिका प्रमुख मेहताले बताए । 

किसानहरूलाई मोटर पम्प वितरण गर्ने उद्देश्य सहित गाउँपालिकाले आर्थिक वर्ष २०८१÷८२ मा ४० लाख रुपैयाँ बजेट बिनियोजन गरेको थियो । 

यसअघिको आर्थिक वर्षमा समेत ३ सय २४ जना किसानलाई पम्प वितरण गरिएको गाउँपालिकाले जनाएको छ ।

देवानगञ्ज गाउँपालिकामा ७ हजार ८ सय ५९ घरघुरी रहेकोमा तीमध्ये ५ हजार ८ सय ९४ अर्थात् ७५ प्रतिशत किसानहरूको बसोबास छ । 

आउँदो आर्थिक वर्ष सम्ममा थप ४ हजार किसानलाई ५० प्रतिशत अनुदानमा मोटर पम्प वितरण गर्ने लक्ष्य राखिएको गाउँपालिकाले जनाएको छ ।