एमाले उर्लाबारीले निधन भएका कार्यकर्ताको गरिदियो खेत रोपाइँ

विराटनगर । नेकपा एमालेको उर्लाबारी नगर कमिटीले पाँच दिनअघि हृदयघातबाट निधन भएका वडा कमिटीका एक कार्यकर्ताको खेत रोपाइँ गरिदिएको छ ।

उर्लाबारी–१ का वडा कमिटी सदस्य देवप्रसाद चौलागाइँको असार २२ गते शनिबार हृदयघात भएर निधन भएपछि रोपाइँ गर्न ठिक पारेको उनको एक बिगाहा खेतको रोपाइँ रोकिएको थियो ।

उर्लाबारी नगर कमिटीको सक्रियतामा बुधबार खेत रोपाइँ गरिदिएको जनाइएको छ ।

स्वर्गीय चौलागाईँकी पत्नी काजक्रियामा बसेको र बालबच्चाहरू पनि साना रहेका कारण रोपाइँ हुन नसकेपछि उर्लाबारी–१ झुम्राहास्थित उनको घरैमा पुगेर समवेदना व्यक्त गर्दै खेत रोपाइँ समेत गरिदिएको नगर कमिटी अध्यक्ष गंगा प्रसाद बाँस्तोलाले बताए ।

उनले दुखमा एमाले भन्ने मर्मलाई सार्थक बनाउन पार्टीका नगरस्तरीय कार्यकर्ताहरूको अगुवाईमा करिव एक बिगाहा खेतमा रोपाइँ गरिएको जानकारी दिए ।

रोपाइँमा प्रदेश सांसद उमाकान्त गौतम, एमाले मोरङकी जिल्ला कमिटी सदस्य एवं उर्लाबारी नगरपालिकाकी उपमेयर  मीना खतिवडा लगायतको उपस्थिति रहेको थियो ।