यी आठ सांसदहरु मध्येबाट चार जना हुँदैछन् मन्त्री

विराटनगर । केन्द्रीय गठबन्धनको मर्म अनुसार कोशी प्रदेश सरकारमा सहभागी हुन लागेको नेपाली कांग्रेसले आज मन्त्रीहरुको नाम टुंगो लगाउन प्रदेश समितिको बैठक बोलाएको छ । विराटनगरको पिपलचोकस्थित प्रदेश समितिको कार्यालयमा आज ११ बजेदेखि बैठक बोलाइएको जनाइएको छ ।

राजिनामा बुझाएर माओवादी सरकारबाट बाहिरिएपछि मुख्यमन्त्री एवं नेकपा एमाले संसदीय दलका नेता हिक्मत कुमार कार्की कांग्रेसलाई सरकारमा स्वागत गर्न पर्खिएर बसेका छन् ।

कांग्रेस र एमालेबीच काठमाडौंमा भएको वार्तामा दुवै दलबीच आलोपालोमा मुख्यमन्त्री चलाउने र यसअघि माओवादीले सम्हालेका मन्त्रालय लिएर सरकारमा सहभागी हुने विषयमा सहमति भइसकेको जनाइएको छ ।

एमालेसँग उक्त सहमति भइसक्दा समेत कांग्रेसले भने सरकारमा पठाउने मन्त्रीहरुको नाम टुंग्याउन आफ्नो दलभित्र भने महाभारत भएको छ ।

कांग्रेस उच्चस्रोतका अनुसार कांग्रेसबाट मन्त्री बन्नका लागि सभापति देउवा निकट मानिएका सांसदहरू अमृत अर्याल, प्रदीप सुनुवार, हिमाल कार्की, खगेनसिंह हाङ्गाम, डोल्मा तामाङ र शोभा चेम्जोङ मन्त्री भएरै छाड्ने दौडमा छन् ।

उनीहरु मध्ये हाङ्गामलाई सभापति देउवाले नै मन्त्री बनाउन दवाव दिइसकेको स्रोतको भनाई छ । सुनुवार र कार्की यसअघि पनि मन्त्री भइसकेका कारण यसपटकका लागि ‘रिङ आउट’ हुनसक्ने जनाइएको छ ।

संस्थापन पक्षमै रहेका कृष्णप्रसाद सिटौला पक्षका भीम पराजुली, भूपेन्द्र राई तथा शेखर कोइराला पक्षका प्रदेश सांसद गोविन्द गिरी र मान बहादुर लिम्बु पनि मन्त्री हुने दौडमा छन् । सिटौला समुहबाट पराजुली तथा शेखर समुहबाट गिरी मन्त्री बन्ने कांग्रेस स्रोतले ठोकुवा गरेको छ ।

एमालेसँगको सहमतिअनुसार कोशीमा कांग्रेसले जम्मा चारवटा मन्त्रालय पाउने जनाइएको छ ।

यसअघि माओवादी मन्त्रीहरूले सम्हालिरहेका तीन वटा मन्त्रालय भौतिक पूर्वाधार, वन, वातावरण तथा पर्यटन, स्वास्थ्य कांग्रेसले पाउने निश्चित भइसकेको छ । त्यस्तै सामाजिक विकास मन्त्रालय र कृषि मन्त्रालयमध्ये थप एउटा मन्त्रालय कांग्रेसले लिने सहमति भएको जनाइएको छ । 

मन्त्रालय थोरै र आकांक्षी धेरै भएको र तीन वटै गुटको शक्ति सन्तुलन मिलाउनुपर्ने भएका कारण कांग्रेसभित्र मन्त्री छान्न ढिलाइ भइरहेको नेताहरू बताउँछन् ।