बेलबारीमा ट्रिपरले बोलेरोलाई ठक्कर दिँदा तीन जनाको मृत्यु

विराटनगर । मोरङको बेलबारीमा ट्रिपरले बोलेरोलाई ठक्कर दिँदा बोलेरोमा सवार तीन जनाको मृत्यु भएको छ । 

शुक्रबार बिहान करिव साढे ६ बजेतिर मे १ झ २८५६ नम्बरको बोलेरोलाई प्रदेश ०२– ००१ ख ९६७६ नम्बरका ट्रिपरले ठक्कर दिँदा बोलेरोमा सवार झापाको कमल गाउँपालिका- २ का ५२ वर्षीय यदुकान्त भट्टराई, ४४ वर्षीया दिपा खनाल र ३६ वर्षीय कृष्ण गजुरेलको मृत्यु भएको जिल्ला प्रहरी कार्यालय मोरङका प्रवक्ता प्रहरी नायब उपरीक्षक रञ्जनकुमार दाहालले जानकारी दिए ।

बोलेरोमा सवार सोही ठाउँका हरि खनाल र गायत्री भट्टराई गम्भिर घाइते भएका छन् । उनीहरूको विराटनगरस्थित न्यूरो अस्पतालमा उपचार भइरहेको प्रहरीले जनाइएको छ ।

ट्रिपरले बोलेरो ठक्कर दिएपछि बोलेरो उछिट्टिएर प्रदेश ३ क ००१ ख २७१८ नम्बरको यात्रुबाहक बसको पछाडिको भागमा गएर ठोक्किएको थियो । 

बेलबारी नगरपालिका– ३ स्थित पुरानो मालपोत जाने बाटोमा दुर्घटना भएको हो । प्रहरीले प्रहरीले ट्रिपर चालक मोरङको सुन्दरहरैंचा नगरपालिका– ७ का २३ वर्षीय चन्द्रबहादुर विकलाई नियन्त्रणमा लिएको जनाएको छ ।