महापुराणको पूर्वसन्ध्यामा कलशयात्राको तयारी

विराटनगर । अक्षयकोष स्थापना र पितृ उद्धारका लागि गर्न लागिएको श्रीमद्भागवत महापुराणको पूर्वसन्ध्यामा विराटनगरमा एक हजार मानिसको उपस्थितिमा कलशयात्रा र नगरपारिक्रमा गरिने तयारी गरिएको आयोजकहरुले बताएका छन् ।

विराटनगर–४ ग्रीनपार्कमा रहेको रुद्रेश्वर शिव पाञ्चायन मन्दिरले आयोजना गर्न लागेको महापुराणका लागि  मंसिर १६ गते आइतबार बिहान कलशयात्रा र परिक्रममा गर्न लागिएको मन्दिर समितिका अध्यक्ष शम्भु पोखरेलले जानकारी दिए ।

उनका अनुसार कलशयात्राले मन्दिरदेखि पुष्पलालचोकसम्म परिक्रमा गरेपछि गाडी र मोटरसाइकलमा नगर परिक्रमा गरिनेछ ।

पुष्पलालचोकदेखि रोडषेशचोकसम्म गरिने परिक्रमामा पुराणका मुख्य वाचक योगेश भण्डारी  र पण्डित श्याम पौडेलसमेत सहभागी हुने बताइएको छ । 

पुराण वाचन मंसिर १७ देखि २३ गतेसम्म हुनेछ । पुराणमा दान गर्ने दाताहरुलाई आयोजकले बिभिन्न खाले सम्मानको व्यवस्था गरेको छ । 

दान अनुसार रुद्राक्षमाला, रामनामी, दोसल्ला शिलालेखजस्ता सम्मान गरिने बताइएको छ । एक हजार एक सय रुपैयाँ भन्दा माथि र एक लाख रुपैयाँ भन्दा माथि दान गर्नेहरुलाई बिभिन्न खाले सम्मान गरिने मुल आयोजक समितिका संयोजक नुर्जप्रसाद तिम्सिनाले बताए । 

उनका अनुसार वर्षमा एक पटक महापुराण लगाउने उद्देश्यले एक करोड रुपैयाँको अक्षयकोष स्थापना गर्न लागिएको हो ।

साउन महिनामा शिवको आराधना गर्न परपर धाउनु पर्ने स्थानीयको बाध्यतालाई सहज बनाउन २०७९ मा शिवालय स्थापना गरिएको थियो । 

स्थानीय वेदनाथ घिमिरेले आधा भन्दा कम मूल्यमा दिएको जमिनमा सरकारी र स्थानीयवासीले जुटाएको रकमबाट स्थानीयले मन्दिर बनाएका हुन् । 

विराटनगर महानगर, मुख्यमन्त्री कार्यालय र प्रदेश पर्यटन मन्त्रालयले मन्दिरका लागि सहयोग गरेका थिए ।