कांग्रेस केन्द्रीय कार्यसमिति बैठक सुरु, पुस १६-१९ मा महाधिवेशन गर्ने महामन्त्री थापाको प्रस्ताव पेश

ललितपुर । नेपाली कांग्रेसको केन्द्रीय कार्यसमिति बैठक सानेपामा सुरु भएको छ । 

पार्टीका कार्यवाहक सभापति पूर्णबहादुर खड्काको सभापतित्वमा दिउँसो २ः०० बजेदेखि सुरु भएको बैठकमा उपसभापति धनराज गुरुङ, महामन्त्रीद्वय गगनकुमार थापा र विश्वप्रकाश शर्मा, नेता शेखर कोइरालालगायत पदाधिकारी केन्द्रीय सदस्यहरु, आमन्त्रित केन्द्रीय सदस्यहरु र प्रदेश सभापतिहरु सहभागी छन् ।

बैठकमा महामन्त्री गगन थापाले महाधिवेशनको कार्यतालिका पेश गरेका छन् । स्रोतका अनुसार महामन्त्री थापाले पुस १६ देखि १९ सम्म महाधिवेशन गर्ने प्रस्ताव गरेका हुन् ।

आजको बैठकमा महाधिवेशनको कार्यतालिका प्रस्तुत हुनेगरी तयारी भएको केन्द्रीय सदस्य कुन्दनराज काफ्लेले जानकारी दिएका थिए ।

जेनजी आन्दोलनपछिको विकसित परिस्थितिमा असोज २८ गतेदेखि सुरु भएको बैठक असोज ३० र ३१ गते, त्यसपछि कात्तिक १३ र १४ गते सञ्चालन भएको थियो ।