विराट राजाको दरबारमा सरसफाई

विराटनगर : विराटनगर महानगरपालिका–१८ स्थित विराट राजाको दरबार क्षेत्रको सरसफाई गरिएको छ । शनिबार विराटनगर महानगरपालिकासहित नेपाली सेना, सशस्त्र प्रहरी, नेपाल प्रहरी, नगर प्रहरी र स्थानीयबासीहरूले मिलेर दरबार क्षेत्रको सफाई गरेका हुन् ।

महानगरपालिकाका मेयर नागेश कोइराला, उपमेयर शिल्पा निराला कार्की लगायतले सरसफाई अभियानमा साथ दिएका छन् । 

मेयर कोइरालाले विराट राजाको दरबार क्षेत्रको विकासमा महानगरपालिकाले सहयोग गर्दै आएको बताए । उनले हाल पोखरी निर्माणमा एक करोड बढी रकम खर्च गरिसकेको जानकारी दिए । 

दरबार क्षेत्रको गुरुयोजना निर्माण गरी त्यस क्षेत्रकै विकास हुने गरी काम गर्न महानगरपालिकाले प्रदेश र संघ सरकारलाई आग्रह गर्दै आएको पनि बताए ।