माहेश्वरी महिला मञ्चले गर्‍यो आँखा शिविर

विराटनगर । माहेश्वरी महिला मञ्चले रामलाल गोल्छा आँखा अस्पताल प्रतिष्ठानसँगको सहकार्यमा गरेको आँखा शिविरमा ३०५ जनाको आँखाको नि:शुल्क परीक्षण र ४५ जनाको शल्यक्रिया गराएको छ । शल्यक्रिया गराउनेमा मोतियाविन्दुका विरामी छन् । शिविरमा आएका विरामीलाई आवश्यक औषधि पनि नि:शुल्क वितरण गरिएको थियो ।

माहेश्वरी महिला मञ्चको आयोजनामा  विराटनगर–१ स्थित सयपत्री आधारभूत विद्यालयमा आँखा शिविर गरिएको थियो । 

गोल्छा आखा अस्पताल प्रतिष्ठानका चिकित्सक रुचि शाहको नेतृत्वको टोलीले बिरामीको आँखा परीक्षण गरिएको र मोतियाविन्दुका विरामीको गोल्छा आँखा अस्पतालमा  शल्यक्रिया गरिएको मञ्चकी अध्यक्ष पुनम राठीले जानकारी दिइन् ।

कार्यक्रममा मञ्चले अस्पताल प्रतिष्ठानलाई प्रदान गरेको सम्मानपत्र प्रतिष्ठानका अध्यक्ष सुरेन्द्र गोल्छाले ग्रहण गरेका थिए ।

अखिल भारतीय माहेश्वरी महिला संगठनका उपाध्यक्ष गिरिजा शारडाले गोल्छालाई सम्मानपत्र प्रदान गरेकी थिइन् । कार्यक्रममा विद्यालयका ७५ जना विद्यार्थीलाई स्वीटर पनि वितरण गरिएको थियो ।