शौच गर्न गएकी युवतीमाथि सामूहिक बलात्कार,  तीन अभियुक्त सार्वजनिक

विराटनगर । शौच गर्न खोलातिर गएकी मोरङ कटहरी गाउँपालिका–३ की एक २२ वर्षीय युवतीलाई बलात्कार गरी हातखुट्टा बाँधेर मुखमा कपडा कोचिदिएर छाड्ने एक भारतीय युवकसहित तीनजनालाई प्रहरीले पक्राउ गरी सार्वजनिक गरेको छ ।

मंगलबार बिहान साढे ४ बजेको समयमा कटहरी–२ कदमगाछीस्थित बाँसघारी नजिक खेतमा लगेर ती युवकहरूले युवतीको सामूहिक बलात्कार गरेको खुलेको छ ।

पीडित ‘विराटनगर ६३’ (परिवर्तित नाम) लाई उनीहरूले दुबै हातखुट्टा बाँधेर बलात्कार गरी र मुखमा कपडा कोचेर छाडेको अवस्थामा स्थानीयले युवतीलाई अर्धचेत अवस्थामा फेला पारेका थिए ।

घटनास्थलबाट जिल्ला प्रहरी कार्यालय मोरङबाट खटिएको प्रहरीले पीडित युवतीको उद्धार गरी अहिले कोशी अस्पतालमा उपचार भइरहेको जनाइएको छ ।

पक्राउ पर्नेमा भारतको विहार राज्यको अररिया जिल्ला कुसकिट्टा ग्राम पञ्चायत–९ हस्तचोकका १८ वर्षीय महमद गुल्जरसहित कटहरी गाउँपालिका–२ का २० वर्षीय महमद रमजान र १९ वर्षीय सुनिलकुमार साह रहेका छन् । बलात्कारमा संलग्न भारतीय युवक गुल्जर हाल कटहरी–२ को ग्यारेजमा काम गर्दै आएका थिए । तीनैजनालाई प्रहरीले मंगलबार नै पक्राउ गर्न सफल भएको हो । 

तीन युवकहरूको समूहले पीडित युवतीलाई घर पछाडि रहेको जुडी खोलामा शौच गर्न गएको समयमा  पछाडिबाट मुख छोपेर अपहरण गरी बलपूर्वक सिटी सफारीमा राखेर लगेको अनुसन्धानका क्रममा खुलेको प्रहरीले जनाएको छ । 

जिल्ला प्रहरी कार्यालय मोरङका प्रवक्ता प्रहरी नायव उपरीक्षक वेदप्रकाश जोशीका अनुसार संलग्न युवकहरूले पीडित युवतीलाई घरबाट करीव ३ किलोमिटर उत्तर पूर्वमा पर्ने बाँसघारीमा लगेर बलात्कार गरेको र हातखुट्टा बाँधेर मुखमा कपडा समेत कोचिएको अवस्थामा उद्धार गरिएको बताए ।

उनले पीडितसँगको प्रारम्भिक बयान तथा अनुसन्धानबाट बलात्कारमा संलग्न तीन युवकको पहिचान गरिएको जानकारी दिए । 

पक्राउ परेका तीनैजना युवकविरुद्ध अपहरण तथा शरीर बन्धक, ज्यान मार्ने उद्योग र जबरजस्ती करणी सम्बन्धी कसुरमा थप अनुसन्धान अघि बढाएको जनाइएको छ ।