विराटेश्वरमा ज्येष्ठ नागरिक मैत्री अस्पताल बन्ने

विराटनगर । विराटनगर–८ सिंघियास्थित विराटेश्वर बृद्धाश्रममा ज्येष्ठ नागरिक मैत्री अस्पताल बन्ने भएको छ । आश्रमका अध्यक्ष जगतप्रसाद अर्यालले आफ्नो ८४ वर्षको उमेरसँगै आश्रमका ज्येष्ठ नागरिकको सहज उपचारका लागि ज्येष्ठ नागरिक मैत्री अस्पताल सञ्चालनमा ल्याउन लागेका हुन् । 

ज्येष्ठ नागरिकको उपचारमा आइपर्ने विभिन्न किसिमका अप्ठ्याराहरूलाई व्यवस्थापन गर्न आश्रम परिसरभित्र ३० लाखको लागतमा १० कोठे अस्पताल निर्माणाधीन अवस्थामा छ ।

आश्रममा साधारण उपचारका लागि न्यूरो अस्पताल, नोबेल, विराट नर्सिङ्ग होम, आँखा अस्पताल लगायतका स्वास्थ्यसँग सम्बन्धित संस्थाहरूको प्राविधिक सहयोग रहनेछ । हाल आश्रममा ६० वर्षदेखि ९५ वर्ष उमेरका २९ महिला र ३३ पुरुष गरी ६२ जना आश्रित छन् ।

अर्यालले शैक्षिक क्षेत्रबाट अवकाश पाएपछि २०६० साल पुस १ गतेबाट आश्रम सुरु गरेका थिए । उनले एक व्यक्तिबाट पाँच रुपैयाँ संकलन गरेर २०५८ सालमा आश्रम सञ्चालन गर्ने संकल्प लिएका थिए । 

उनको यो संकल्पलाई सुरुमा सबैले मास्टर अवकाश हुने बेलामा बौलायो भनेर खिस्सीट्यूउरी गरेका थिए । 

यसरी संकलन गर्दा उनले आठ वर्षमा प्रधानमन्त्री केपी ओली, पूर्वराष्ट्रपति विद्यादेवी भण्डारी, भरतमोहन अधिकारीसहित चार लाख ९२ हजार नौ सय तीन जनाबाट रु ५ का दरले २४ लाख ६४ हजार पाँच सय १५ रुपैयाँ संकलन गरेर विराटनगर–८ सिंघिया छेउमा १२ कठ्ठा आश्रमलाई जग्गा जोडेको बताए । 

अहिले आश्रममा ५६ पुरुष र ४४ महिला गरी १ सय १० जना राख्न सक्ने क्षमता रहेको छ । 

अस्पताल सञ्चालनपछि आश्रममा सबै क्षेत्रलाई भावनात्मक रुपले जोड्न तीनपुस्ते नेसनल लिवर्टी पार्क र सबै किसिमका मठमन्दिर निर्माण गरेर पर्यटकीय रूपमा आश्रमलाई चिनाउने उद्देश्य रहेको अर्यालले बताए ।