नेप्से २७६० को विन्दुमा पुग्दा ९ अर्ब ४१ करोडको कारोबार

काठमाडौं । मौद्रिक नीति सकारात्मक आउँदा पनि साताको दोस्रो दिन घटेको सेयर बजार मंगलबार भने फेरि दोहोरो अंकले बढेको छ ।

नेप्से ३४.४६ अंकले बढेर २७६०.१७ को विन्दुमा पुग्दा ९ अर्ब ४१ करोड ९१ लाख रुपैयाँको सेयर किनबेच भएको छ ।

१३ मध्ये म्युचुअल फण्डबाहेक सबै समूहको सूचक हरियो हुँदा बजार बढेको हो । वाणिज्य बेंक सर्वाधिक १.८१ प्रतिशतले बढेको छ ।

फाइनान्स १.७९, जलविद्युत १.७१, लघुवित्त १.२८, विकास बैंक १.२२ र लगानी समूह १.०८ प्रतिशतले बढेको छ । ३९ कम्पनीको सेयरमूल्य घट्दा २०९ कम्पनीको बढेको छ । सुपर मादी हाइड्रोपावरको ८.०८ र राप्ती हाइड्रोको सेयरमा ५.८६ प्रतिशतको वृद्धि छ ।

बजारमा सर्वाधिक कारोबार हुने शीर्ष ५ कम्पनीमा बुटवल पावर पहिलो भएको छ । उक्त कम्पनीको ५२ करोड ३२ लाख रुपैयाँको सेयर किनबेच भएको छ ।

यस्तै निफ्राको हरित ऋणपत्रको अस्वाभाविक कारोबार भएको छ ।

गत बुधबार मात्रै नेप्सेमा सूचीकृत उक्त ऋणपत्र मंगलबार एकै दिन ५० करोड ५१ लाख २१ हजार रुपैयाँको किनबेच भएको छ ।

यसैगरि राधी विद्युतको ४३ करोड ९७ लाख र एनआइसी एसिया बैंकको सेयर ३० करोड ३१ लाख रुपैयाँको कारोबार भएको छ ।

यसअघि मौद्रिक नीति आएपछिको पहिलो कारोबार दिनमा गत आइतबार नेप्से २९ अंकले बढेर २७६०.८० विन्दुमा रहँदा ११ अर्ब ४१ करोड ६४ लाख रुपैयाँको कारोबार भएको थियो । सोमबार नेप्से ३५.०९ अंकले घट्दै २७२५.७१ को विन्दुमा बजार बन्द हुँदा ३२१ कम्पनीको ८ अर्ब १७ करोड २१ लाख रुपैयाँको कारोबार भएको थियो ।