उद्योग परिसंघ कोशीद्वारा न्यानो कपडा र खाद्यान्न वितरण

विराटनगर । नेपाल उद्योग परिसंघ कोशी प्रदेश समितिले मोरङको रतुवामाई नगरपालिका–१ कुटुमगञ्जस्थित जनकल्याण छेतन आधारभूत विद्यालयमा अध्ययनरत १२२ जना विद्यार्थीलाई न्यानो कपडा र खाद्यान्न वितरण गरेको छ ।

परिसंघका कोशी प्रदेश अध्यक्ष पवन कुमार सारडाको नेतृत्वमा शुक्रबार विद्यालयमै पुगेर विद्यार्थीहरूलाई न्यानो कपडा र खाद्यान्न वितरण गरिएको जनाइएको छ । 

विद्यालयमा अध्यनरत १२२ जना विद्यार्थीलाई जाडोमा लगाउने ट्रयाक सुट, टोपी, मोजा, बिस्कुट, जुस र सरसफाईका लागि साबुन र सर्फ वितरण गरिएको हो ।

जाडो मौसममा न्यानो कपडाको अभावमा विद्यालय जान समस्या भइरहेका बालबालिकाहरूलाई कपडा र खाद्यान्न सामग्री वितरण गरेको परिसंघका महानिर्देशक विजय हरि शर्माले बताए । 

न्यानो कपडा वितरण कार्यक्रममा रतुवामाई नगरपालिका मेयर नागेश्वर प्रसाद सिंह, उपप्रमुख दमयन्ता देवी चुडाल, परिसंघ कोशीकी उपाध्यक्ष गिरिजा सारडा, महिला उद्यम समिति संयोजक रचना राठी लगायतको उपस्थिति रहेको जनाइएको छ ।