चार जिल्लाबाट फरार भएका पाँच अभियुक्त पक्राउ

विराटनगर । झापा, मोरङ, उदयपुर र पाँचथर जिल्लाको छुट्टाछुट्टै स्थानहरुबाट बुधवार, बिभिन्न मुद्दाका ५ जना फरार अभियुक्तलाई प्रहरीले पक्राउ गरेको छ ।

इलाका प्रहरी कार्यालय दमकबाट खटिएको प्रहरी टोलीले ज्यान मार्ने उद्योग मुद्दामा झापा जिल्ला अदालतको फैसलाले ३ वर्ष कैद र ३० हजार रुपैयाँ जरिवाना तोकिएका दमक–३ का २९ बर्षीय शम्भु लिम्बूलाई गाउँघरबाटै पक्राउ गरेको हो ।

यसैगरी घरमा आगो लगाएको मुद्दामा मोरङ जिल्ला अदालत विराटनगरको फैसला आदेशले ६ महिना कैद भई फरार रहेका मोरङ लेटाङ–३ का ३० बर्षीय सुमन राईलाई इलाका प्रहरी कार्यालय लेटाङबाट खटिएको प्रहरी टोलीले पक्राउ गरेको हो । 

त्यस्तै गाली बेइज्जती मुद्दामा उदयपुर जिल्ला अदालतको फैसलाले ५–५ हजार जरिवाना तोकिएका बेलका–५ का ६२ बर्षीय डम्बरबहादुर कटवाल र ५२ वर्षीय तिलकबहादुर कट्वाललाई प्रहरी चौकी लालबजारबाट खटिएको प्रहरी टोलीले पक्राउ गरेको हो ।

यसैगरी डाका मुद्दामा पाँचथर जिल्ला अदालत पाँचथर फिदिमको फैसलाले कैद ६ बर्ष र १२ हजार ५ सय १० जरिवाना भएका फक्तालुङ गाउँपालिका– ६ ताप्लेजुङका २९ बर्षीय राजु ताप्मादेन लिम्बू भन्ने दिव्य लिम्बूलाई लुकिछिपी बसेको अवस्थामा फेला पारी पक्राउ गरेको हो ।

पक्राउ परेका उनीहरुलाई तोकिएको कैद तथा जरिवाना भुक्तानको लागि सम्बन्धित अदालतहरुमा उपस्थित गराइएको प्रहरीले जनाएको छ ।