अवैध मदिरा र गाँजा बोकेका दुई गाडी नियन्त्रणमा

विराटनगर । ताप्लेजुङको पाथीभरा याङ्वरक गाउँपालिका–१ मेवाखास्थित मेची राजमार्गबाट अवैध मदिरा बोकेको सवारी साधन प्रहरीले नियन्त्रणमा लिएको छ । 

सोमबार साँझ प्रहरी चौकी मेवाखाबाट खटिएको प्रहरी टोलीले चेकजाँचको क्रममा इलामको फिक्कलबाट ताप्लेजुङतर्फ जाँदै गरेको मे. १ च ४२१४ नम्वरको पिकअप गाडीमा अवैधरूपमा बोकेको ५० कार्टुन सिक्किमे मदिरा बरामद गरेको हो ।

मदिरा ओसारपसारमा संलग्न झापा बुद्धशान्ति गाउँपालिका– ३ का महेन्द्र बर्देवा, चालक बुद्धशान्ति–३ का सनम राई र सवारी साधनलाई आवश्यक कारवाहीको लागि पशुपतिनगर भन्सार कार्यालय इलाममा बुझाइएको कोशी प्रदेश प्रहरी कार्यालय विराटनगरले जनाएको छ ।

यसअघि सोमबार प्रहरीले विराटनगर महानगरपालिका–१५ बाट भारतीय नम्बरको कारबाट लागुऔषध गाँजा बरामद गरेको  थियो । 

कोशी प्रदेश प्रहरी कार्यालय विराटनगरको प्रादेशिक अनुसन्धान समूहबाट खटिएको प्रहरी टोलीले चेकजाँचको क्रममा नेपालबाट भारततर्फ जाँदै गरेको बीआर ३८ एडब्लु ३७७६ नम्बरको कारको डिक्कीमा लुकाई राखेको अवस्थामा १ सय ३ किलोग्राम गाँजा फेला पारेको थियो । 

सो कार  नियन्त्रणमा लिई थप अनुसन्धान भइरहेको इलाका प्रहरी कार्यालय रानीले जनाएको छ ।