जिल्ला अस्पताल उदयपुरको मेसुमा डा. मण्डलको सरुवा

विराटनगर । कोशी प्रदेश सरकारले जिल्ला अस्पताल उदयपुरको मेडिकल सुपरिटेन्डेन्टमा ११ औं तहका डा. वीरेन्द्र कुमार मण्डललाई सरुवा गर्ने निर्णय गरेको छ ।

मंगलबार बसेको मन्त्रिपरिषद् बैठकले प्रदेश स्वास्थ्य आपूर्ति व्यवस्थापन केन्द्र विराटनगरका निर्देशक रहेका डा. मण्डललाई जिल्ला अस्पताल उदयपुरमा कामकाज गर्ने गरी सरुवा गरेको हो । 

जिल्ला अस्पताल उदयपुरका दुई वर्षदेखि कार्यरत रहेका मेसु डा. ज्ञानेन्द्र कुमार झाको दुई साता अघि सरुवा भएपछि अस्पतालको नेतृत्व रिक्त रहेको थियो । 

मन्त्रिपरिषद् बैठकले स्वास्थ्य मन्त्रालयका १० औं र ११ औं तहका तीन कर्मचारीको मंगलबार सरुवा गरेको जनाइएको छ ।

१० औं तहका वरिष्ठ जनस्वास्थ्य प्रशासक ज्ञानबहादुर बस्नेतलाई प्रदेश स्वास्थ्य निर्देशनालय धनकुटाबाट स्वास्थ्य आपूर्ति व्यवस्थापन केन्द्र विराटनगरमा सरुवा गरिएको छ ।

त्यसैगरी स्वास्थ्य मन्त्रालय कोशी प्रदेशका वरिष्ठ जनस्वास्थ्य प्रशासक डा. सुरेश मेहतालाई प्रदेश स्वास्थ्य निर्देशनालय धनकुटामा सरुवा गर्ने निर्णय मन्त्रिपरिषद्ले गरेको जनाइएको छ ।