बारामा क्याम्पस प्रमुखको हत्या गरी मोरङमा लुकेका कुशवाह पक्राउ

विराटनगर । बाराको कलैयास्थित रामराजा मोहनविक्रम शाह बहुमुखी क्याम्पसका तत्कालीन क्याम्पस प्रमुख हरिभूषण कुशवाहको हत्या प्रकरणका मुख्य अभियुक्त मोरङबाट पक्राउ परेका छन् ।

बाराको आदर्शकोतवाल गाउँपालिका–२ का ४१ वर्षीय सुरेन्द्रप्रसाद कुशवाहलाई मोरङको ग्रामथान–५ कखरमारीबाट बारा प्रहरीले मंगलबार पक्राउ गरेको हो । जिल्ला प्रहरी कार्यालय बाराले बिहीबार पत्रकार सम्मेलन गरी कुशवाहलाई सार्वजनिक गरेको छ । उनी कखरमारीमा खेती गरेर बसेको बताइएको छ ।

क्याम्पस प्रमुखको हत्यापछि फरार रहेका उनी मोरङ आएर किसान बनेर बसेका थिए । अन्तर प्रदेश प्रहरी समन्वयबाट उनलाई बारा प्रहरीले पक्राउ गरेर लगेको मोरङका प्रहरी नायव उपरीक्षक वेदप्रकाश जोशीले बताए । 

नेपाली सेनाका भगौडा तथा आपराधिक पृष्ठभूमि भएका कुशवाह कसको खेतीमा काम गर्थे वा आफैं जमिन जोडेका थिए भन्ने खुलिसकेको छैन ।

उनी नेपाली सेनाबाट भागेपछि गाउँघरमा त्रसित बनाएर बसेको बारा प्रहरीले जनाएको छ ।

घटना पश्चात् फरार रहेका सुरेन्द कुशवाहलाई बाराबाट खटिएको विशेष टोली उनी लुकेको ठाउँ पत्ता लगाएर पक्राउ गरेको बताइएको छ ।

क्याम्पस प्रमुख कुशवाहको गत जेठ ३२ गते आदर्शकोतवाल–२ खजुरिया भन्ने ठाउँबाट कलैयातर्फ आउँदै गर्दा गोली प्रहार गरी हत्या भएको थियो । 

प्रहरीका अनुसार मृत्यु अघि क्याम्पस प्रमुख कुशवाहले सुरेन्द्र कुशवाहले आफूमाथि गोली प्रहार गरेको बताएका थिए ।

सुरेन्द्र घटना पश्चात् फरार रहेर भारतका विभिन्न स्थानमा लुकेर बसेको र पछिल्लो समय मोरङ आएको खुलेको छ । 

हत्याका मुख्य अभियुक्त सुरेन्द्रसहित घटनामा १७ जनाको संलग्नता रहेको खुलेको थियो । उक्त घटनामा प्रयोग भएको पेस्तोल २ थान, गोली ७ राउण्डपनि प्रहरीले फेला पारेको थियो ।