लिलाबल्लभ अधिकारी थप ७ दिन हिरासतमा

विराटनगर । कोशी प्रदेशका पूर्वआन्तरिक मामिला तथा कानूनमन्त्री लिलाबल्लभ अधिकारी थप ७ दिन हिरासतमा राखेर अनुसन्धान गर्न अनुमति दिएको छ ।

मानव तस्करी तथा सरकारी लिखत कीर्तेको कसुरमा पक्राउ परेका अधिकारीलाई जिल्ला अदालत काठमाडौंले थप ७ दिन हिरासतमा राख्ने अनुमति दिएको हो ।

अधिकारीलाई विराटनगरस्थित उनकै निबासबाट आइतबार प्रहरीले नियन्त्रणमा लिएर काठमाडौं लगेको थियो । अधिकारीले भने अनुसन्धानमा सहयोग गर्न आफु काठमाडौं गएको बताएका थिए ।

उनलाई सोही दिन २ दिन हिरासतमा राख्न अदालतबाट प्रहरीले अनुमति लिएको थियो । अधिकारीमाथि थप अनुसन्धानका लागि प्रहरीले १० दिनको म्याद थप गर्न माग गरेको थियो । तर अदालतले ७ दिनको अनुमति दिएको हो ।

यसैबीच, प्रहरीले पूर्वमन्त्री अधिकारीसहित जापान पुगेका खोटाङको केपीलासलगढी गाउँपालिका–४ का ४१ वर्षीय जनक राई, खोटाङकै ऐसेलुखर्क गाउँपालिका–२ का ३७ वर्षीय दावा शेर्पा र रसुवाको कालिका गाउँपालिका–५ का २१ वर्षीय कञ्चन देवकोटालाई समेत पक्राउ गरिसकेको छ । 

आफुलाई फसाएर जापान पुर्याएको दाबी गर्दै आएका पूर्वमन्त्री अधिकारीले राई, शेर्पा र देवकोटालाई आफैंले पक्राउ गराएको दाबी गर्दै आएका छन् । उनीहरुले अधिकारी मन्त्री पदमा बहाल रहेकै बेलामा आन्तरिक मामिला तथा कानुन मन्त्रालयको कर्मचारीको परिचय पत्र बोकेको फेला परेको थियो ।

उनीहरुलाई जापान पठाउन पैसा असुल गरेको लगायतका आरोपमा प्रहरीले नुवाकोटका २२ वर्षीय जुगल रिजाल, दोलखाका ३० वर्षीय वीरबहादुर सुनुवार र धादिङको त्रिपुरा सुन्दरी गाउँपालिकाका ३४ वर्षीय महेश पाण्डे पनि पक्राउ परेका छन् ।

मन्त्रालयको नक्कली परिचय पत्र बनाउने कार्यमा संलग्न रहेको आरोपमा प्रहरीले सोमबार थप दुईजनालाई पक्राउ गरेको छ । पक्राउ पर्नेमा ओखलढुंगा घर भएका गुढी राई र नविन राई रहेको जनाइएको छ ।