पर्यटन वर्ष सचिवालयको स्थापना

विराटनगर । कोशी प्रदेशमा पर्यटन वर्ष, २०८२ को सचिवालय स्थापना गरिएको छ । आइतबार पर्यटन, वन तथा वातावरण मन्त्रालयमा सोही मन्त्रालयका मन्त्री सदानन्द मण्डलले सचिवालयको उद्घाटन गरेका हुन् । 

मन्त्री मण्डलकै संयोजकत्वमा रहने सचिवालयमा ‘कोशी प्रदेश पर्यटन वर्ष २०८२’ का लागि कोशी प्रदेश सरकारद्वारा नियुक्त गरिएका सहसंयोजकद्वय भविशकुमार श्रेष्ठ र कृष्णकुमार साहले पदीय जिम्मेवारी सम्हालेका छन् । कोशी प्रदेश सरकारले गत असोज ११ गते आगामी वर्ष २०८२ साललाई कोशी प्रदेश पर्यटन वर्षका रुपमा मनाउने घोषणा समारोह सम्पन्न गरिसकेको छ । सरकारले पर्यटन वर्षका लागि ‘डिलाइटफुल कोशी अर्थात ‘रमणीय कोशी’ भन्ने नारा तय गरिसकेको छ ।

पर्यटन वर्षको तयारीका लागि प्रदेश सरकारले १० करोड रुपैयाँ बजेट विनियोजन गरेको जनाइएको छ । २०८२ वैशाख १ गते प्रदेश सरकारले भव्य समारोहका साथ पर्यटन वर्षको उद्घाटन गर्ने तयारी गरिरहेको पर्यटन, वन तथा वातावरण मन्त्रालयले जनाएको छ ।