हातखुट्टा बाँधिएको अवस्थामा अचेत भेटिइन् महिला

विराटनगर । मंगलबार बिहान सबेरै घरबाट निस्किएकी मोरङकी एक महिला दिउँसो हातखुट्टा बाँधिएको अवस्थामा अचेत भेटिएकी छन् । 

कटहरी गाउँपालिका–२ स्थित एउटा बाँसको झ्याङमा ती महिला अचेत भेटिएको जिल्ला प्रहरी कार्यालय मोरङका डिएसपी वेदप्रकाश जोशीले जानकारी दिए ।

अन्दाजी २३ वर्षीया महिलालाई स्थानीयले हातखुट्टा बाँधिएको अवस्थामा दिउँसो फेला पारेका थिए । उनको मुखमा पट्टि लगाइएको थियो । स्थानीयले देखेपछि प्रहरीलाई बोलाइएको र  प्रहरीले ती महिलालाई उपचारका लागि कोशी अस्पतालमा पठाएको थियो । 

‘उहाँ बिहान घरबाट सबेरै निस्कनुभएको रहेछ’, डिएसपी जोशीले भने ‘दिउँसो एक्कासी त्यस्तो अवस्थामा भेटिएपछि उहाँलाई कोशी अस्पतालमा भर्ना गराइएको छ । उहाँको स्वास्थ्य अवस्था सुधार छ ।’

जोशीका अनुसार ती महिलाका कपडाहरू पनि केही च्यातिएका छन् । उनी जहदा गाउँपालिका निवासी स्थानीय हुन् । घटनास्थल घरदेखि अन्दाजी दुई किलोमिटर टाढा छ । 

उपचारमा रहेकी महिलाको अवस्था सुधार भइरहेको हुँदा अब घटनाको कारणबारे अनुसन्धान हुने डिएसपी जोशीले बताए । 

‘घटनामा सुरूमा हामीले अस्पतालमै पठायौं । अहिले सुधार भइरहेको हुँदा के भएको हो भन्नेबारे बुझ्दैछौं’, डिएसपी जोशीले भने । 

विवाहित महिलाका दुई सन्तान रहेको तथा उनी आफ्ना पतिसँग अलग बस्दै गरेको पनि खुलेको छ । यद्यपि उपचारका क्रममा रहेकाले प्रहरीले उनीसँग सोधपुछ केही गरेको छैन ।