गोहीगाडा माविबाट ४२ विद्यार्थीको विदाइ, छात्राले मागे चेन्जिङ रुम

विराटनगर । रंगेली नगरपालिका–१ स्थित त्रिभुवन माध्यमिक विद्यालय गोहीगाडाले शैक्षिक सत्र २०८० को कक्षा १० का विद्यार्थीहरुलाई बिहीबार विदाइ गरेको छ । विद्यालयले कक्षा १० मा अध्ययनरत ४२ जना विद्यार्थीहरुलाई विद्यालयबाट विदाइ गरेको हो ।

विदाई हुँदै छात्राहरुले विद्यालयमा ‘चेन्जिङ रुम’ को व्यवस्था गर्न विद्यालय प्रशासनसँग आग्रह गरेका छन् ।

उनीहरुले आफू अध्ययनरत रहेको समयमा भोग्नु परेको समस्या सुनाउँदै आगामी दिनमा अन्य छात्राहरुलाई समस्या नहोस् भनेर विद्यालयका प्रधानाध्यापक केशरबहादुर बानियाँलाई चेन्जिङ रुमको व्यवस्था गर्न आग्रह गरेका हुन् । 

छात्राहरु रन्जना खड्का, पिंकी धामी, निशा राजधामी र माधुरी उरावलगायतले चेन्जिङ रुम नहुँदा छात्राहरुलाई समस्या भएको गुनासो पोखेका थिए । 

विदाइका क्रममा बोल्दै छात्र विजयकुमार राया, नवराज बस्नेत लगायतले विद्यार्थीहरुलाई गुणस्तरीय शिक्षा प्रदान गर्न विद्यालयले महत्वपूर्ण योगदान पुर्‍याएको बताएका थिए ।