उदयपुरको बेल्टारमा आगलागी, तीन घर जले

विराटनगर । उदयपुरको चौदण्डीगढी नगरपालिका–७ बेल्टार बजारको कल्याणचोकमा मंगलबार दिउँसो भएको आगलागीमा तीनवटा घर जलेका छन् । 

स्थानीय शरण राई, सर्वधन राई र कालुमान राईको घर जलेको इलाका प्रहरी कार्यालय बेल्टारले जनाएको छ ।

प्रहरीका अनुसार सर्वधनको घरमा विजुली सर्ट भएर आगलागी सुरु भएको जनाइएको छ । आगलागीबाट तीनवटै घर पूर्ण रुपमा जलेका छन् ।

चौदण्डीगढी नगरपालिका, रौतामाई गाउँपालिका र सप्तरीको कन्चनरुप नगरपालिकाको दमकलको सहयोगमा सशस्त्र प्रहरी, नेपाल प्रहरी र स्थानीयले आगो नियन्त्रणमा लिएका हुन् ।

आगलागीबाट छिमेकका घरहरूमा समेत क्षति पुगेको जनाइएको छ । प्रहरीले क्षतिको विवरण संकलन गरिरहेको जनाएको छ ।