जेनिथ कलेजद्वारा छ सम्मानित

विराटनगर । विराटनगरस्थित जेनिथ इन्टरनेशनल कलेजले उद्योगी भीम घिमिरेसहित ६ जनालाई सम्मान गरेको छ । 

कलेजको वार्षिकोत्सवका अवसरमा नेपाल उद्योग परिसंघका केन्द्रीय उपाध्यक्षसमेत रहेका घिमिरेसहित ब्रम्हाकुमारी राजयोग सेवा केन्द्रकी ब्रम्हाकुमारी गीता ख्वाखली र शिक्षासेवी सहप्रध्यापक राधेश्याम राठीलाई सम्मान गरेको हो । 

त्यस्तै पूर्वाञ्चल विश्वविद्यालयको व्यवस्थापन संकायका डिन डा सन्देशदास श्रेष्ठ, कलेजका शिक्षक प्राडा नन्दलाल साह र सहप्राध्यापक प्रदीपकुमार दुबे पनि सम्मानित भएका छन् ।

उनीहरुलाई पूर्वाञ्चल विश्वविद्यालयका उपकुलपति प्राडा यादवराज कोइराला र कलेजका कार्यकारी अध्यक्ष प्राडा दुर्गानन्द चौधरीले दोसल्ला ओढाएर सम्मानपत्र प्रदान गरेका थिए । 

उद्योग, समाजसेवा र शैक्षिक क्षेत्रमा महत्वपूर्ण योगदान पुर्‍याएबापत उनीहरुलाई सम्मान गरिएको कलेजका निर्देशक फेल्लो चार्टर्ड एकाउन्टेन्ट (एफसीए) अश्विनी वंशलले जानकारी दिए ।

त्यस्तै २०८० सालमा भएका विभिन्न खेलकुद प्रतियोगिताका विजयी विद्यार्थीलाई पुरस्कारसमेत प्रदान गरिएको थियो । विद्यार्थीहरुले सांस्कृतिक नृत्य र गीतसमेत प्रस्तुत गरेका थिए ।