लगातार बढेको नेप्सेमा करेक्सन, २६ अर्ब ५७ करोडको कीर्तिमानी कारोबार

काठमाडौं । लगातार बढेको सेयर बजार सूचक आइतबार करेक्सन भएको छ । परिसूचक १८.४४ अंकले घटेर २९६४.२० को विन्दुमा रहँदा २६ अर्ब ५७ करोड ७४ लाख रुपैयाँको कारोबार भएको छ ।

११ महिनायता यो उच्च कारोबार हो । आइतबार १२ बजेर ५१ मिनेटमा नेप्से बढ्दै ३०१३.१८ को विन्दुमा पुगेको थियो । त्यसयता क्रमिक घटेको हो ।

विकास बैंक, उत्पादन तथा प्रशोधन, लघुवित्त, म्युचुअल फण्ड र व्यापारबाहेक सबै समूह घटेका छन् ।

व्यापार १.४४, विकास बैंकमा १.२३ र उतपादन तथा प्रशोधन १.०८ प्रतिशतले बढेका छन् । घटेका समूहमध्ये फाइनान्स १.९९, होटल तथा पर्यटन, लगानी १.६६ र जलविद्युतमा १.०९ प्रतिशत गिरावट छ ।

६३ कम्पनीको सेयरमूल्य बढेको छ भने १८६ को घटेको छ । घटेकामध्ये नारायणी विकास बैंककको सेयरमूल्य ६.३४ प्रतिशतले ओह्रालो लागेको छ ।

बढेकामध्ये दुई कम्पनी समता घरेलु लघुवित्त र ट्रेड टावरको सेयरमा पोजेटिभ सर्किट नै लागेको छ ।

सान्भी इनर्जी ९.९८ र लुम्बिनी विकास बैंक ८.४७ प्रतिशतले बढेका छन् । बजारमा शिवम् सिमेन्टको उच्च कारोबार भएको छ ।

उक्त कम्पनीको सेयर १ अर्ब २ करोड रुपैयाँको किनबेच भएको हो । यस्तै ज्ञादी ग्रुपको ८८ करोड ९० लाख, नेपाल पुनर्बीमाको ८५ करोड २ लाख, कालिका पावरको ८४ करोड ६५ लाख र ग्रीन भेञ्चर्सको ७६ करोड ६ लाख रुपैयाँको कारोबार भएको छ ।

यसअघि गत बिहीबार १८ अर्ब ४९ करोड ४ लाख रुपैयाँको सेयर कारोबार भएको थियो ।