पका अर्थात काले तामाङको नाम अब 'प्रकाश मोक्तान', घरैमा पुगेर दिइयो नागरिकता

विराटनगर । लोकप्रिय युट्युब च्यानल ‘हेर्ने कथा’ ले प्रशारण गरेको ‘हराएका वर्षहरु’ का मुख्य पात्र पका अर्थात काले तामाङको नाम ‘प्रकाश मोक्तान’ कायम भएको छ । उनलाई आइतबार घरैमा पुगेर जन्मको दर्ता प्रमाणपत्र र त्यस लगत्तै नागरिकताको प्रमाणपत्र प्रदान गरिएको हो ।

प्रकाशलाई इलाका प्रशासन कार्यलय प्रमुख बिनोद अधिकारी र षडानन्द नगरपालिकाका मेयर सुरेन्द्र उदासले नागरिकताको प्रमाणपत्र हस्तान्तरण गरेका हुन् । वडा नम्बर १० का वडाध्यक्ष प्रेमा दोर्ची शेर्पाले उनलाई जन्मदर्ताको प्रमाणपत्र प्रदान गरेका थिए । प्रकाशको जन्म मिति २०३७ साल फागुन १० गते कायम भएको जनाइएको छ ।

उनले इलाका प्रशासन कार्यालय दिङ्लाबाट ०९–०२–८१–००३५७ नम्बरको नागरिकता प्राप्त गरेको प्रकाशलाई सहयोग जुटाउन सक्रिय रहेका पत्रकार राजेश राईले जानकारी दिए । 

इलाका प्रशासन कार्यालय दिङ्लाको टोलीसहित जनप्रतिनिधीहरुको उपस्थितिमा षडानन्द नगरपालिका–१० साङ्पाङ् छाप्ले गाउँस्थित घरमै पुगेर उनलाई नागरिकता दिइएको हो । प्रकाशले ४१ वर्षमा नागरिककता पाएका हुन् ।

प्रकाश चुमभ्यालीबाट अन्तिम विदाई भएर शनिबार भोजपुरस्थित घर फर्किएका हुन् । गलैंचा बुन्नका लागि काठमाडौं पुगेका उनी १० बर्षको उमेरमा बेपत्ता भएका थिए । उनी गोरखा जिल्लाको उच्च हिमाली क्षेत्र चुमभ्यालीमा पुगेका थिए । करिव ३६ बर्षपछि उनलाई ‘हेर्ने कथा’ ले प्रशारण गरेको ‘हराएका वर्षहरु’ मार्फत घर फर्किएका थिए ।