गाँजा बोकेर भाग्दै गरेको पिकअपसहित तीनजना पक्राउ

विराटनगर । ५६ किलो गाँजा बोकेर भाग्दै गरेको एउटा पिकअपलाई सुनसरी प्रहरीले नियन्त्रणमा लिएको छ । 

धनकुटाबाट धरानतर्फ आउँदै गरेको को १ ज ३१५८ नम्बरको पिकअपलाई रोक्न खोज्दा भागेपछि प्रहरीले पछ्याउने क्रममा गाडीसहित गाँजा तस्करीमा संलग्न तीनजना पक्राउ परेका हुन् । 

पक्राउ पर्नेमा पिकअपका चालक धरान–२० का ३४ वर्षीय कमल राई, सहचालक धनकुटा साँगुरीगढी गाउँपालिका–९ का २० वर्षीय राजु विश्वकर्मा र धरान–२० कै २३ वर्षीय प्रदीप राई रहेको जिल्ला प्रहरी कार्यालय सुनसरीका प्रवक्ता प्रहरी नायव उपरीक्षक रामप्रसाद तिमल्सिनाले बताए । 

गाडीसहित पछ्याउने क्रममा उनीहरूलाई धरान–२० विष्णुपादुकाबाट नियन्त्रणमा लिइएको जनाइएको छ ।

प्रहरीले गाडीलाई शंका लागेर रोक्न खोज्दा भागेका कारण पछ्याएर नियन्त्रणमा लिइएको जनाइएको छ । 

उनीहरूलाई पिकअपमा रहेको गाँजाको बोरा भीरबाट फाल्दै गरेको अवस्थामा प्रहरी चौकी बिष्णपादुकाका प्रहरी सहायक निरीक्षक दयाराम खतिवडाको नेतृत्वको प्रहरी टोलीले नियन्त्रणमा लिइएको जनाइएको छ ।

पक्राउ परेका तीनैजनालाई जिल्ला अदालत सुनसरीमा अवैध लागुऔषध ओसारपसार कारोबार अन्तरगत सुनसरी जिल्ला अदालतबाट म्याद थप गरी थप अनुसन्धान सुरु गरिएको प्रहरीले जनाएको छ ।