एमाले महानगरले सुरु गर्यो 'मेरो वडा आफैं बनाउँछु' अभियान

विराटनगर । नेकपा एमाले विराटनगर महानगर कमिटीले ‘मेरो वडा आफैं बनाउँछु’ अभियान सञ्चालन गर्ने भएको छ । सोमबार विराटनगरमा सम्पन्न एमाले महानगर कमिटीको बैठकले ३२ दिने अभियान सञ्चालन गर्ने निर्णय गरेको हो ।

कमिटीको नवौ पूर्ण बैठकले अभियानलाई प्रभावकारी बनाउन बिभिन्न गतिबिधि गर्ने निर्णय गरेको महानगर अध्यक्ष सागर थापाले बताए । विराटनगरबाट सुरु हुने वडा बनाउने अभियान देशब्यापी फैलने उनको दाबी छ । वडा बने मात्रै देश बनाउन सकिने उनको तर्क छ । यसअघि वडा जिताऊँ अभियान विराटनगरबाटै सञ्चालन गरेर देशब्यापी भएको उनको भनाइ छ ।

वडा बनाउने अभियानमा महानगर भित्रका पार्टीका नेताहरु सबै वडामा परिचालित भएर जनतालाई जागरुक गराउने छन् । अभियान अन्तर्गत कमिटीहरुको सुदृढीकरण, वडाहरुको ब्यवस्थापन, टोल कमिटीहरु, जनसंगठनहरु पुनर्गठन, भेला, बैठक, जनतासँग जनप्रतिनिधिको साक्षात्कार गराइने छ ।

विराटनगर महानगरपालिकाका निर्वाचित जनप्रतिनिधिको दुई वर्षीय कार्य प्रगति विवरण लिएर जनताको बीचमा जाने समेत निर्णय भएको छ ।

थापाका अनुसार एमाले महानगरले १९ वटै वडामा वैसाख मसान्तभित्र वडास्तरीय प्रशिक्षण कार्यक्रम समेत सञ्चालन गर्ने छ । यसैबीच एमाले महानगर कमिटीले कार्यसम्पादनलाई सहज बनाउन कार्यालय समिति गठन गरेको छ । अध्यक्ष थापा अध्यक्ष र रोहित कोइराला सचिव रहेको ११ सदस्यीय समिति गठन गरिएको छ ।

बैठक तथा प्रशिक्षणात्मक कार्यक्रमलाई सम्वोधन गर्दै नेकपा एमालेका स्थायी कमिटी सदस्य तथा कोशी प्रदेशका पूर्व मुख्यमन्त्री हिक्मत कार्कीले जनताका बीचमा उत्कृष्ट कार्यक्रम र योजना लिएर जान निर्देशन दिए ।

उनले अब जनताले गफ हैन काम हेरेर विश्वास गर्ने दिन आएको जानकारी दिंदै नेकपा एमालेका हरेक नेता कार्यकर्ता जनताप्रति उत्तरदायी भएर अघि बढ्नुपर्ने बताए । कार्यक्रममा नेताहरुले बिभिन्न विषयमा प्रशिक्षण दिएका थिए ।

नेकपा एमाले मोरङका उपाध्यक्ष बाबुराम कार्कीले जनप्रतिनिधि र पार्टीबीचको अन्तरसम्बन्ध, नेकपा एमाले कोशी प्रदेशका अध्यक्ष घनश्याम खतिवडाले दशौं राष्ट्रिय महाधिवेशनका फैसलाहरु र पार्टीको आगामी कार्यदिशा, केन्द्रीय सदस्य रामलाल साहले नेता र कार्यकर्ताबीचको सम्बन्ध र हाम्रो दायित्व, केन्द्रीय सदस्य तथा विराटनगर महानगरका इञ्चार्ज हेमराज राईले दक्षिणपन्थी अवसरवाद र सांगठनिक अराजकतालगायतका विषयमा प्रशिक्षण दिए ।