कोशी प्रदेशका पाँच जिल्लाका सिडिओको सरुवा, मोरङमा कट्टेल

विराटनगर । गृह मन्त्रालयले कोशी प्रदेशका पाँच जिल्लासहित ३६ जिल्लाका प्रमुख जिल्ला अधिकारीहरूको सरुवा गरेको छ । 

मन्त्रालयले आइतबार ३६ जना सहसचिवको सरुवा गर्दा ३० जिल्लाका प्रमुख जिल्ला अधिकारी (सिडिओ) फेरिएका छन् ।

गृह मन्त्रालयले प्रकाशित गरेको सरुवाको सूचीअनुसार कोशी प्रदेशका झापा, मोरङ, सुनसरी, उदयपुर र धनकुटा जिल्लाका सिडिओ हेरफेर भएका छन् । 

मन्त्रालयले मोरङका सिडिओ ईन्द्रदेव यादवलाई महोत्तरी सरुवा गरेको छ । उनको ठाउँमा युवराज कट्टेल आउने भएका छन् । कट्टेल राष्ट्रिय परिचयपत्र तथा पञ्जीकरण विभागबाट सरुवा भएर मोरङ आउन लागेका हुन् ।

त्यस्तै सुनसरीका सिडिओ धर्मेन्द्रकुमार मिश्रको बारा सरुवा भएको छ । सुनसरीमा बासुदेव घिमिरे आउने भएका छन् । 

त्यसैगरी झापामा शिवराम गेलालको सरुवा भएको छ । गेलाल धनकुटाका सिडिओ हुन् । धनकुटामा रौतहटबाट सरुवा भई विनोद खडका आउँदै छन् । 

झापाका अहिलेका सिडिओ गोपालकुमार अधिकारीको काभ्रेपलाञ्चोक सरुवा भएको छ । 

यसैगरी उदयपुरका सिडिओ प्रेमप्रसाद लुईंटेलको धनुषा सरुवा भएको छ । उनको ठाउँमा बाँकेका धर्मराज जोशीलाई सरुवा गरिएको छ ।