तरकारी बोक्ने मिनिट्रकबाट समातियो ५४४ केजी गाँजा

विराटनगर । प्रहरीले भेडेटारबाट ५४४ केजी गाँजा बरामद गरेको छ । साँगुरीगढी गाँउपालिका– ६ भेडेटार चोकबाट मिनिट्रकका लोड गरिएको अवस्थामा उक्त परिमाणको गाँजा बरामद गरेको कोशी प्रदेश प्रहरी कार्यालय विराटनगरले जनाएको छ ।

आइतबार राती करिव पौने ८ बजेतिर इलाका प्रहरी कार्यालय भेडेटारको प्रहरी टोलीले भेडेटारमै रोकेर राखेको को १ ख ३२९४ नम्बरको मिनिट्रक चेकजाँचका क्रममा लोड भएको तरकारीको बोराभित्र लुकाइएको ५४४ केजी लागूऔषध गाँजा बरामद गरेको हो ।

प्रहरीले विशेष सूचनाका आधारमा मिनिट्रकमा लागूऔषध गाँजाको ओसार पसार भइरहेको सूचना पाएर ट्रक रोकेर चेकजाँच गरेको जनाएको छ ।

उक्त गाँजासहित ट्रक पनि नियन्त्रणमा लिइएको छ । तर मिनिट्रकका चालक भने तत्काल फरार भएको भन्दै खोजतलास भइरहेको र जिल्ला प्रहरी कार्यालय धनकुटाले थप अनुसन्धान पनि अघि बढाएको जनाइएको छ ।